នៅក្នុងជម្លោះមួយដែលអាមេរិកចោទរុស្ស៊ីថា លូកលាន់ចូលកិច្ចការបោះឆ្នោតរបស់ខ្លួននោះ នៅថ្ងៃនេះ រដ្ឋបាលប្រធានាធិបតី ដូណាល់ ត្រាំ បានសម្រេចដាក់ទណ្ឌកម្មប្រឆាំងនឹងទីភ្នាក់ងារចារកម្មកំពូលរបស់រុស្ស៊ី និងបុគ្គលជាច្រើននាក់ទៀត ក្រោមការចោទថា បានព្យាយាមគ្រប់គ្រងលើការបោះឆ្នោតប្រធានាធិបតីអាមេរិកកាលពីឆ្នាំ២០១៦ និងការវាយប្រហារតាមប្រព័ន្ធអ៊ីនថឹណិត ២ករណីដាច់ដោយឡែកទៀត។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
អាមេរិកបានប្រកាសឲ្យដឹងពីទណ្ឌកម្មថ្មីនេះ ក្រោយពីការពន្យាពេលយ៉ាងយូរ ដែលជំរុញឲ្យមានកំហឹងនៅឯវិមានរដ្ឋាភិបាលអាមេរិក និងជំរុញឲ្យមានការចោទសួរទៅលើឆន្ទៈរបស់លោក ត្រាំ ក្នុងការប្រឈមមុខនឹងក្រុងមូស្គូ។
វិធានការនេះ បានដាក់ទៅលើក្រុមហ៊ុនចំនួន ៥ និងបុគ្គល ១៩រូប ក្នុងនោះមានស្ថាប័ន FSB ដែលជាទីភ្នាក់ងារចារកម្មកំពូលរបស់រុស្ស៊ី ទីភ្នាក់ងារចារកម្មយោធា ឬ GRU និងមនុស្ស ១៣នាក់ផ្សេងទៀត ដែលបញ្ជាក់ដោយលោក Robert Mueller ទីប្រឹក្សាពិសេសអាមេរិកដោះស្រាយករណីនេះ។
វិធានការនេះក៏ត្រូវបានដាក់ទៅលើបុគ្គលផ្សេងទៀតដែលស្ថិតនៅពីក្រោយការវាយប្រហារលើប្រព័ន្ធអ៊ីនថឹណិត ដែលប៉ុនប៉ងវាយលុកលើប្រព័ន្ធថាមពលអាមេរិក។
សេចក្ដីសម្រេចបែបនេះ បានកើតឡើង បើទោះបីជាលោក ត្រាំ បានបដិសេធម្ដងហើយម្ដងទៀតថា រុស្ស៊ីមិនបានព្យាយាមលូកលាក់លើកិច្ចការបោះឆ្នោត ដើម្បីជួយដល់រូបលោកនោះឡើយ ដោយមានក្ដីបារម្ភថា ជ័យជម្នះរបស់លោកលើអ្នកស្រី ហ៊ីលឡារី គ្លីនតុន អាចនឹងធ្លាក់ចូលក្នុងបញ្ហាចោទ៕
