ប្រធានាធិបតីជាប់ឆ្នោតថ្មីប្រទេសហ្វីលីពីន លោក Rodrigo Duterte កាលពីថ្ងៃអាទិត្យម្សិលមិញបានប្ដេជ្ញាប្រើប្រាស់ឡើងវិញនូវទោសប្រហារជីវិតនិងផ្ដល់បទបញ្ជាឲ្យកម្លាំងសន្តិសុខបាញ់សម្លាប់ពួកឧក្រិដ្ឋជន។
ទីភ្នាក់ងារព័ត៌មាន AFP បានរាយការណ៍ថានៅក្នុងសន្និសីទកាសែតជាលើកដំបូងបន្ទាប់ពីទទួលជ័យជម្នះយ៉ាងភ្លូកទឹកភ្លូកដីកាលពីថ្ងៃទី០៩ ខែឧសភាកន្លងមកអភិបាលក្រុងប្រកាន់តឹងរូបនេះបានព្រមានថាគំរាមសម្លាប់ឧក្រិដ្ឋជនដែលលោកធ្វើទ្បើងនៅក្នុងយុទ្ធនាការឃោសនាបោះឆ្នោតនោះមិនមែនគ្រាន់តែនិយាយឲ្យរួចពីមាត់នោះឡើយ។
លោកបានថ្លែងថាអ្វីដែលលោកធ្វើគឺជំរុញឲ្យសភាយកច្បាប់ប្រហារជីវិតដោយព្យួរកមកប្រើប្រាស់ឡើងវិញ។
លោកក៏បាននិយាយផងដែរថា លោកនឹងផ្ដល់បទបញ្ជាឲ្យកម្លាំងសន្តិសុខបាញ់សម្លាប់ពួកឧក្រិដ្ឋជនមានអង្គការចាត់តាំងឬមនុស្សទាំងឡាយណាដែលតតាំងយ៉ាងហិង្សាប្រឆាំងការចាប់ខ្លួន។
លោក Duterte បាននិយាយថាទាហានពូកែបាញ់នឹងដាក់បញ្ចូលក្នុងយុទ្ធនាការរបស់លោកដើម្បីសម្លាប់ពួកឧក្រិដ្ឋជន។
លោក Duterte ក៏បានប្ដេជ្ញាដាក់ចេញនូវច្បាប់ហាមឃាត់ការផឹកគ្រឿងស្រវឹងនៅទីធ្លាសាធារណៈនៅក្រោយម៉ោង២យប់និងហាមឃាត់ក្មេងៗមិនឲ្យដើរលើផ្លូវតែម្នាក់ឯងនាពេលយប់ ដោយលោកបញ្ជាក់ថាប្រសិនបើកូនក្មេងត្រូវបានជួបប្រទះលើផ្លូវសាធារណៈតែម្នាក់ឯងនាពេលយប់អាជ្ញាធរនឹងចាប់ខ្លួនឪពុកម្ដាយរបស់ពួកគេដាក់ពន្ធនាគារ៕
ប្រភព៖ Channel News Asia