តំណាងរាស្ត្របក្សប្រឆាំង លោក អ៊ុំ សំអាន ស្នើតុលាការកំពូល លើកពេលសវនាការ លើបណ្តឹងសាទុក្ខ របស់ខ្លួន ប្រឆាំងនឹងសាលក្រមចោទប្រកាន់ របស់សាលាដំបូង ដោយសំអាងថា គ្មានមេធាវីការពារក្តី។
លោក អ៊ុំ សំអាន ដែលសកម្មក្នុងការរិះគន់បញ្ហាព្រំដែន ត្រូវបានសមត្ថកិច្ចចាប់ខ្លួនទាំងមានអភ័យឯកសិទ្ធិសភា ក្នុងខេត្តសៀមរាប កាលពីយប់រំលងអាធ្រាតថ្ងៃ១១ខែមេសាឆ្នាំ២០១៦។
បន្ទាប់មក នៅថ្ងៃទី១០ខែតុលាឆ្នាំ២០១៦ សាលាដំបូងរាជធានីភ្នំពេញ បានសម្រេចផ្តន្ទាទោស លោក អ៊ុំ សំអាន ដាក់ពន្ធនាគារ២ឆ្នាំ៦ខែ និងពិន័យជាប្រាក់៤លានរៀល ដោយចោទពីបទបទញុះញង់ឲ្យប្រព្រឹត្តបទឧក្រិដ្ឋជាអាទិ៍ និងញុះញង់ឲ្យមានការរើសអើង ក្រោយពីតំណាងរាស្ត្ររូបនេះ និយាយថា ការបោះបង្គោលព្រំដែន តាមសន្ធិសញ្ញាបំពេញបន្ថែម ឆ្នាំ២០០៥ ធ្វើឲ្យកម្ពុជាបាត់ដីខ្លះទៀតទៅវៀតណាម។
ប៉ុន្តែការចោទនេះ ត្រូវបានលោក អ៊ុំ សំអាន ច្រានចោល នឹងប្តឹងជាបន្តបន្ទាប់ រហូតដល់តុលាការកំពូល។
នៅថ្ងៃទី១៦ខែមិថុនាឆ្នាំ២០១៧នេះ តុលាការកំពូល បានបើកសវនាការជំនុំជម្រះ លើបណ្តឹងសាទុក្ខ របស់លោក អ៊ុំ សំអាន។ ប៉ុន្តែលោក អ៊ុំ សំអាន បានស្នើសុំតុលាការ ឲ្យលើកពេលវិញ ដោយថា គ្មានមេធាវីការពារ និងបានប្រកាសនៅមុខក្រចកសេះ ថា មិនទទួលយកមេធាវី ដែលតុលាការចាត់តាំងនោះទេ។
VOD មិនអាចទាក់ទង មេធាវីមួយចំនួន ដែលធ្លាប់ការពារលោក អ៊ុំ សំអាន ដូចជា លោក ជូង ជូងី លោក សំ សុគង់ ដើម្បីសុំការបំភ្លឺករណីនេះ បានទេ ដោយទូរស័ព្ទរបស់មេធាវីទាំងពីររូប គ្មានអ្នកទទួល។
យ៉ាងនេះក្តី ប្រធានចៅក្រមក្នុងអង្គជំនុំជម្រះនៃតុលាការកំពូល លោក ឃឹម ប៉ុណ្ណ បានយល់ព្រម តាមសំណើរលោក អ៊ុំ សំអាន ដោយចៅក្រមថា ទុកពេលយ៉ាងយូ៣ខែទៀត ឲ្យលោក អ៊ុំ សំអាន រកមេធាវី។
លោក ឃឹម ប៉ុណ្ណ បញ្ជាក់ថា បើលោក អ៊ុំ សំអាន មិនអាចរកមេធាវីបាន លើសពី៣ខែ លោកថា តុលាការជាន់ខ្ពស់មួយនេះ នឹងរកមេធាវីចាត់តាំង ឲ្យចូលការពារក្តីជំនួសម្តងទៀត។
ជាការកត់សម្គាល់ សវនាការនៅតុលាការកំពូលនៅព្រឹកថ្ងៃសុក្រនេះ មានការរឹតបណ្តឹង ដោយសមត្ថកិច្ចយាមនៅតាមច្រកចូលមិនអនុញ្ញាត អ្នកចូលស្តាប់សវនាការសាធារណនេះ យកទូរស័ព្ទដៃចូលបានទេ ដោយអះអាងថា ជាបញ្ជាររបស់ថ្នាក់លើ។
ក៏ប៉ុន្តែ ក្រឡាបញ្ជី របស់តុលាការកំពូល បានប្រកាសបទបញ្ជាផ្ទៃក្នុង មិនបានហាមអ្នកចូលរួមស្តាប់ យកទូរស័ព្ទដៃចូលក្នុងអង្គសនាការនោះទេ ដោយគ្រាន់តែប្រកាស ហាមថតរូបដោយគ្មានការអនុញ្ញាតិ និងតម្រូវ ឲ្យបិទសំឡេងរោទិ៍តែប៉ុណ្ណោះ៕