រដ្ឋាភិបាលកម្ពុជាបានសម្រេចប្ដូរតំណែងអភិបាលខេត្ដព្រះវិហារលោក អ៊ុំ ម៉ារ៉ា ឲ្យទៅក្រសួងមហាផ្ទៃ ដោយតែងតាំងជំនួសដោយអភិបាលរងលោក អ៊ុន ចាន់ដា ជាអភិបាលខេត្ដជំនួសលោក អ៊ុំ ម៉ារ៉ា។
ព្រះរាជក្រិត្យចុះថ្ងៃទី១២ខែសីហា ដែលចុះហត្ថលេខាដោយលោក សាយ ឈុំ ក្នុងនាមជាប្រមុខរដ្ឋស្តីទី ពេលព្រះមហាក្សត្រអវត្តមាន បានតែងតំាងលោក អ៊ុន ចាន់ដា ជាអភិបាលរងខេត្ដព្រះវិហារ ជាអភិបាលខេត្ដជំនួសលោក អ៊ុំ ម៉ារ៉ា ដោយអតីតអភិបាលខេត្ដរូបនោះទៅកាន់តំណែងថ្មីនៅទីស្ដីការក្រសួងមហាផ្ទៃ។
សង្គមស៊ីវិលធ្វើការផ្នែកសិទ្ធិមនុស្សនិងដីធ្លីនៅខេត្ដព្រះវិហារសារទរចំពោះការផ្លាស់ប្ដូរតំណែងអភិបាលលោក អ៊ុំ ម៉ារ៉ា ទៅក្រសួងមហាផ្ទៃ ដោយថាការកាន់តំណែងយូរអង្វែងរបស់អ្នកដឹកនាំ លោកថាធ្វើឲ្យការដឹកនាំគ្មានប្រសិទ្ធភាពនិងបង្កើតបក្សពួកនិយមនិងគ្រួសារនិយម។
មន្ដ្រីផ្នែកតស៊ូមតិនៃអង្កការពន្លកខ្មែរខេត្ដព្រះវិហារ លោក ប៉ឹក សោភណ្ឌ មានប្រសាសន៍ថាកន្លងមកការដឹកនាំអតីតអភិបាលរូបនោះបានគំរាមកំហែងដល់សង្គមស៊ីវិលផ្នែកសិទ្ធិមនុស្សនិងខ្វះឆន្ទះដោះស្រាយជម្លោះដីធ្លីជូនពលរដ្ឋនៅតំបន់នោះ ដែលលោកថាភាគច្រើនពលរដ្ឋមានជម្លោះដីធ្លីជាមួយក្រុមហ៊ុននិងអ្នកមានអំណាច។
VODមិនអាចទាក់ទងអតីតអភិបាលខេត្ដព្រះវិហារលោក អ៊ុំ ម៉ារ៉ា ដើម្បីសាកសួរបន្ថែមលើករណីនេះបានភ្លាមៗនៅឡើយទេ។
លោក អ៊ុំ ម៉ារ៉ា កាន់តំណែងអភិបាលខេត្ដព្រះវិហារជិត១០មកហើយ ដោយចាប់តាំងពីឆ្នាំ២០០៨ដល់ជាងពាក់កណ្ដាលឆ្នាំ២០១៦នេះ៕