រដ្ឋមន្ត្រីការបរទេសអាមេរិក លោក Rex Tillerson បាននិយាយថា ប្រធានាធិបតីអាមេរិក លោក ដូណាល់ ត្រាំ បានណែនាំរូបលោក ឲ្យបន្តកិច្ចខិតខំប្រឹងប្រែងផ្នែកកាទូត ដើម្បីបន្ថយភាពតានតឹងជាមួយកូរ៉េខាងជើង ដោយលោកថា កិច្ចខិតខំប្រឹងប្រែងផ្នែកកាទូតនឹងបន្តមុននឹងការទម្លាក់គ្រាប់បែកដំបូង។ នេះដោយយោងតាមទូរទស្សន៍ CNN របស់អាមេរិក។
ថ្លែងនៅក្នុងកម្មវិធី«រដ្ឋសហព័ន្ធ»របស់ទូរទស្សន៍ CNN ប្រមុខកាទូតអាមេរិករូបនេះ បានសម្រាលសារនានាដែលលោក ត្រាំ បានបង្ហោះនៅលើ Twitter កាលពីមុន ដោយលោក Tillerson លើកឡើងថា សារទាំងនោះ បានធ្វើឲ្យលោកខ្ជះខ្ជាយពេលវេលាក្នុងការព្យាយាមចរចាជាមួយមេដឹកនាំកូរ៉េខាងជើងលោក គីម ជុងអ៊ុន ដែលត្រូវបានលោក ត្រាំ ដាក់រហស្សនាមថា «បុរសគ្រាប់រ៉ុកកែតតូច»។
លោក Tillerson ថ្លែងថា លោក ត្រាំ បញ្ជាក់ច្បាស់ប្រាប់លោកថា ឲ្យបន្តកិច្ចខិតខំប្រឹងប្រែងផ្នែកកាទូត។
សម្ដីលោក Tillerson នៅថ្ងៃនេះ បានកើតឡើងចំពេលដែលមានភាពតានតឹងកាន់តែខ្លាំងរវាងអាមេរិក និងកូរ៉េខាងជើង ក្រោយពីក្រុងព្យុងយ៉ាងបានសាកល្បងគ្រាប់បែកនុយក្លេអ៊ែរ និងគ្រាប់មីស៊ីលជាច្រើនលើកច្រើនសារចាប់តាំងពីដើមឆ្នាំនេះ និងក្រោយពីសង្គ្រាមពាក្យសម្ដីរវាងមេដឹកនាំប្រទេសទាំងពីរ៕
