មេបញ្ជាការយោធាជាន់ខ្ពស់អាមេរិកថ្លែងកាលពីម្សិលមិញថា កិច្ចសហប្រតិបត្តិការយោធារវាងអាមេរិក និង ហ្វីលីពីននៅតែល្អមិនមានអ្វីប្រែប្រួលទេ បើទោះជាមានការវាយប្រហារត្រង់ៗពីសំណាក់ប្រធានាធិបតីហ្វីលីពីនទៅលើប្រធានាធិបតីអាមេរិកលោក អូបាម៉ាក៏ដោយ។
ប្រធានាធិបតីហ្វីលីពីន លោក រ៉ូឌ្រីហ្គោ ឌូទើតេ បានប្រកាសទាមទារឲ្យដកកងទ័ពអាមេរិកចេញពីភាគខាងត្បូងនៃប្រទេសហ្វីលីពីន ហើយបានជេរប្រមាថលោក អូបាម៉ាជាបន្តបន្ទាប់។
មេបញ្ជាការកងទ័ពអាមេរិកប្រចាំតំបន់អាស៊ីប៉ាស៊ីហ្វិកថ្លែងក្នុងកិច្ចប្រជុំមួយក្នុងទីក្រុងវ៉ាស៊ីនតោនលោកHarry Harrisថា មិនមានអ្វីប្រែប្រួលក្នុងការធ្វើតំនាក់ទងយោធារវាងយោធាអាមេរិក និង ហ្វីលីពីន។
លោក Harris លើកឡើងបែបនេះ នៅក្នុងកិច្ចប្រជុំកម្រិតខ្ពស់មួយ ជាមួយថ្នាក់ដឹកនាំកងទ័ពហ្វីលីពីន ដើម្បីពិភាក្សាពីការធ្វើសមយុទ្ធរួមគ្នានៅឆ្នាំ២០១៧បន្តទៀត ដែលកិច្ចប្រជុំនេះធ្វើឡើងនៅសហរដ្ឋអាមេរិក។
នៅភាគខាងត្បូងហ្វីលីពីន ជាតំបន់ដែលមានក្រុមបះបោរផ្តាច់ខ្លួន ហើយរដ្ឋាភិបាលហ្វីលីពីនព្រមឲ្យអាមេរិកដាក់កងទ័ព ដើម្បីជួយថែរក្សាសន្តិសុខ។ ទោះយ៉ាងណា ក្រោយពេលប្រធានាធិបតីហ្វីពីនថ្លែង បណ្តេញយោធាអាមេរិកចេញពីហ្វីលីពីននោះ រដ្ឋមន្ត្រីការបរទេសនៃប្រទេសនេះ ព្យាយាមបកស្រាយក្នុងន័យបន្ធូរស្ថានការណ៍ថា ហ្វីលីពីនមិនមែនចង់បណ្តេញកងទ័ពអាមេរិកចេញពីប្រទេសទេ គឺគ្រាន់តែប្រារម្ភពីសុវត្ថិភាពរបស់អាមេរិក។