រដ្ឋាភិបាលបានធ្វើអនុប្រយោគដីជា៣ម៉ឺនហិកតា ដែលគ្រប់ដណ្តប់លើឃុំចំនួន៤ ក្នុងស្រុកសេសាន ខេត្តស្ទឹងត្រែង សម្រាប់ជាគោលដៅធ្វើជាដីសម្បទានសេដ្ឋកិច្ច ដើម្បីអភិវឌ្ឍន៍គម្រោងវារីអគ្គិសនីសេសានក្រោម២។
តាមអនុក្រឹត្យដែលចុះហត្ថលេខាដោយលោកនាយករដ្ឋមន្ត្រីហ៊ុន សែន កាលពីថ្ងៃទី១៧ខែវិច្ឆិកា ឆ្នាំ២០១៧ បានសម្រេចធ្វើអនុប្រយោគកែប្រែដីពីសាធារណៈរបស់រដ្ឋទៅជាឯកជនរបស់រដ្ឋ លើផ្ទៃដីទំហំ ៣២ ៣០៥,២២ ហិកតា ស្ថិតនៅក្នុងឃុំភ្លុក ឃុំតាឡាត់ ឃុំស្រែគរ និង ឃុំក្បាលរមាស ស្រុកសេសាន។
តាមអនុក្រឹត្យដីដែលត្រូវបានធ្វើអនុប្រយោគនេះស្ថិតនៅក្រោមការចាត់ចែងដោយក្រសួងរ៉ែ និងថាមពល ហើយក្រសួងសេដ្ឋកិច្ច និងហិរញ្ញវត្ថុជាអាជ្ញាធរគ្រប់គ្រងជាទ្រព្យសម្បត្តិរបស់រដ្ឋ។
