រដ្ឋាភិបាលមានគម្រោងជួលដីនៅតាមព្រំដែនកម្ពុជានិងវៀតណាមទៅឲ្យក្រុមហ៊ុនចិនធ្វើកសិកម្ម ដោយថាដើម្បីបង្កើនការងារជូនប្រជាពលរដ្ឋនិងការពារព្រំដែន។
អភិបាលខេត្តតាកែវ លោក ឡាយ វណ្ណៈ បានឲ្យវីអូឌីដឹងថា កាលពីឆ្នាំ២០១៦កន្លងទៅ លោកបានស្នើដល់ក្រុមហ៊ុនចំនួនពីររបស់ចិនឲ្យមកធ្វើការវិនិយោគទៅវិស័យកសិកម្មនៅតាមព្រំដែនកម្ពុជានិងវៀតណាម។ លោកបន្ថែមថាក្រុមហ៊ុនទាំងពីរនោះមានក្រុមហ៊ុន ស៊ាងដា និង លីហ្វុង បានសន្យាថានឹងចុះកិច្ចព្រមព្រៀងវិនិយោគកសិកម្ម ដែលគិតជាទឹកប្រាក់ប្រមាណជាង១០០លានដុល្លារ។ ទោះជាយ៉ាងណាលោកមិនទាន់អាចបញ្ជាក់បានទេថាក្រុមហ៊ុនទាំងនោះវិនិយោគលើដីប៉ុន្មានហិកតានិងនៅក្នុងស្រុកណាខ្លះទេ ដោយថានឹងជួបចរចាបន្តជាមួយក្រុមហ៊ុនទាំងនោះ។
លោកថា៖ «ខ្ញុំបានស្នើគាត់ដើម្បីឲ្យស្របតាមគោលនយោបាយរបស់រាជរដ្ឋាភិបាលដែលថាមិនឲ្យជួលដីស្រែតាមព្រំដែនទៅឲ្យប្រទេសជិតខាង មិនថាថៃ មិនថាវៀតណាមទេ ឲ្យតែប្រទេសជិតខាង។ ដែលយើងអាចសល់ដីនៅតាមព្រំដែន ហើយខ្ញុំបានស្នើដល់ក្រុមហ៊ុនលីហ្វុងហ្នឹង ដើម្បីឲ្យគាត់ជួលដីស្រែពីប្រជាពលរដ្ឋដើម្បីកុំឲ្យពួកគាត់ទុកដីហ្នឹងទំនេរ និងជួយពួកគាត់ក្នុងការរកដីឲ្យពួកគាត់ និងឲ្យប្រជាពលរដ្ឋអាចដាំស្រូវនាំចេញទៅកាន់ខេត្តហួរប៉ីដែរ»។
នាយកប្រត្តិបត្តិសម្ព័ន្ធគណនេយ្យភាពសង្គម លោក សន ជ័យ យល់ថានេះកម្សោយរបស់រដ្ឋាភិបាលក្នុងការអភិវឌ្ឍតាមព្រំដែនរបស់ខ្លួន។ លោកបន្ថែមថាបើទោះបីជាសម្រេចជួលដីឲ្យចិនវិញក៏ដោយ ក៏លោកថាវាគ្រាន់តែជាការផ្លាស់ប្តូរពីការជួលបែបចាស់ទៅជាបែបថ្មីប៉ុណ្ណោះ ដែលវានៅតែមានគ្រោះថា្នក់ដល់ព្រំដែនកម្ពុជាដដែល។
លោកថា៖ «ទោះជាចិនមិនមានព្រំដែនជាប់កម្ពុជាក៏ដោយ ក៏ប៉ុន្តែមុខសញ្ញារបស់គេគឺការរកផលចំណេញ ហើយប្រសិនជាគេរកមិនបាន ទៅតាមផែនការគេសួរថា តើគេសុខចិត្តទុកដីហ្នឹងនៅទំនេរ គេឲ្យមកកម្ពុជាវិញ ឬក៏គេជួលទៅវៀតណាមបន្តទៀត ដូចដែលធ្លាប់ធ្វើកន្លងមក។ សូម្បីម្ចាស់ដីជាខ្មែរផងនៅតែជួលដីឲ្យយួន!»។
លោកថាដើម្បីអាចឲ្យកម្ពុជាការពារបានបូរណភាពព្រំដែនខ្លួននោះ មិនមានវិធីណាដែលល្អជាងសកម្មភាពរបស់ប្រទេសកម្ពុជាខ្លួនឯងនោះទេ ក្នុងការវិនិយោគព្រំដែននេះ។ លោកថាកម្ពុជាត្រូវធ្វើយ៉ាងណាឲ្យព្រំដែនទាំងនោះជាកន្លែងសម្បូរការងារ មានហេដ្ឋារចនាសម្ព័ន្ធគ្រប់គ្រាន់ នោះពិតជាអាចទាក់ទាញប្រជាពលរដ្ឋឲ្យទៅរស់នៅ ហើយវាអាចជាខែលការពារព្រំដែនរបស់ខ្លួនដោយខ្លួនឯងផងដែរ។
គួរបញ្ជាក់ផងដែរថា កាលពីថ្ងៃទី១៧ ខែវិច្ឆិកា ឆ្នាំ២០១៥ រដ្ឋាភិបាលបានចេញសារាចរហាមជួលឬលក់ដីស្រែចំការឬលំនៅដ្ឋាននៅតាមតំបន់ព្រំដែន ឲ្យទៅប្រជាពលរដ្ឋនៃប្រទេសជិតខាង រួមទាំងតំបន់មិនទាន់បានកំណត់ខណ្ឌសីមានិងបោះបង្គោលព្រំដែនផ្លូវការរួចជាស្ថាពរ។ រដ្ឋាភិបាលលើកឡើងថាការជួលដីជាប់ព្រំដែនឲ្យទៅប្រទេសជិតខាង ថាបានបង្កភាពស្មុគស្មាញដល់កិច្ចការរបស់គណៈកម្មាធិការចម្រុះកិច្ចការព្រំដែនក្នុងការអនុវត្តការងាររបស់ខ្លួន។ ទោះជាយ៉ាងណាបក្សប្រឆាំងធ្លាប់បានលើកឡើងថាបើទោះបីជាមានសារាចរនេះក៏ដោយក៏ដីមួយចំនួននៅតែមានបន្តជួលឲ្យទៅប្រទេសជិតខាងដដែលដែលស្ថិតក្រោមរូបភាពលាក់បាំងពីអាជ្ញាធរ៕