នាយករដ្ឋមន្ត្រី រំឭកជាថ្មីទៀត ឲ្យកម្មករស្វែងយល់ពីការអភិវឌ្ឍជាតិចេញពីចំណុចសូន្យ ទើបលោកថា ការសម្រេចនយោបាយមិនវង្វេងទិស។
ក្នុងពិធីជួបកម្មករ ក្នុងរាជធានីភ្នំពេញនៅថ្ងៃនេះលោក ហ៊ុន សែន បានអំពាវនាវជាថ្មីទៀត ឲ្យកម្មករបោះឆ្នោតគាំទ្រគណបក្សប្រជាជនកម្ពុជា របស់លោក ដែលកំពុងគ្រប់គ្រងអំណាច។
លោក ហ៊ុន សែន បានរំឭកថា មានតែគណបក្សរបស់លោកទេ បានកសាងប្រទេស ចេញពីបាតដៃទទេ រហូតមានអគារខ្ពស់ៗ ស្ពានថ្នល់ និងហេដ្ឋារចនាសម្ព័ន្ធផ្សេងទៀតដូចប្បច្ចុប្បន្ន។ លោកថាមិនតែប៉ុណ្ណោះ គណបក្សលោក បានលុបបំបាត់ភាពក្រីក្រ ពី១០០%មកសល់ត្រឹម៩% គិតត្រឹមថ្ងៃដែលលោកថ្លែងសារនេះ។
លោក ហ៊ុន សែន បានបញ្ជាក់ថា ការស្វែងយល់បែបនេះ ទើបការសម្រេចចិត្តមិនវង្វេងទិស។
លោកថា៖ «មិនចាំបាច់ពិនិត្យអំពីស្ថានភាពរួមរបស់ប្រទេសជាតិ របស់យើងដោយនៅលើដងផ្លូវពោពេញទៅដោយយានយន្តនិងទៅចក្រក្រយាន្តយន្ត និងមធ្យោបាយដឹកជញ្ជូនស្អេកស្កះរហូតទៅដល់ស្ទះចរាចរណ៍ទេ សូមពិនិត្យតែគ្រួសារក្មួយៗទើបអាចយល់។ ប្រសិនបើមិនដូច្នោះយើងនឹងវង្វេងទិស ហើយវាយតម្លៃខុសនូវការពិតដែលយើងបានឆ្លងកាត់»។
កាលពីអំឡុងចុងឆ្នាំមុន លោក ហ៊ុន សែន បានប្រាប់មន្ត្រីក្រោមឱវាទថា កម្មករភាគច្រើន ពួកគេមាននិន្នាការ គាំទ្របក្សប្រឆាំង ប៉ុន្តែថា ពេលនេះ លោកនឹងបង្កើនភាពស្និតស្នាល តាមរយៈចុះជួបផ្ទាល់ ដើម្បីទាក់ទាញប្រជាប្រិយវិញ។
ក្រសួងការងារ និងបណ្តុះបណ្តាលវិជ្ជាជីវៈអះអាងថា កម្មករជិត៨០ម៉ឺននាក់ កំពុងបម្រើការក្នុងវិស័យកាត់ដេរ និងដេរស្បែកជើង។
ប្រធានកម្មវិធីចងក្រងនៅមជ្ឈមណ្ឌសម្ព័ន្ធភាពការងារ និងសិទ្ធិមនុស្ស លោកស្រី ឆន សុខា និយាយថាជាទម្លាប់នៅពេលជិតបោះឆ្នោតអ្នកនយោបាយតែងតែបង្កើនភាពស្និតស្នាល និងបង្ហាញពីការយកចិត្តទុកដាក់ទៅលបញ្ហានានារបស់ពលរដ្ឋ រួមទាំងកម្មករ។
ប៉ុន្តែលោកស្រីថា ដើម្បីកុំឲ្យកម្មករវង្វេងទិស ឬចង់បានការគាំទ្រពីកម្មករ រដ្ឋាភិបាលត្រូវតែប្រាកដថាអ្វីដែលបានសន្យាត្រូវធានាពិប្រសិទ្ធិភាពនៃការអនុវត្ត។
លោកស្រីថា៖ «យើងអត់ចង់បានដល់ពេលបោះឆ្នោតទើបមានការសន្យាអញ្ចឹង។ យើងចង់បាន ឲ្យការសន្យា ហ្នឹង ទៅជាច្បាប់ ហើយការអនុវត្ត [ច្បាប់] ហ្នឹងឲ្យមានប្រសិទ្ធភាពទៀត»។
យ៉ាងណាក៏ដោយក្នុងពីធីនោះ លោក ហ៊ុន សែន បានជំរុញរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈលោក អ៊ិត សំហេង ម្តងទៀតឲ្យតាមដានពីយន្តការ៨ចំនុច របស់លោក ដែលលោកថា ត្រូវផ្តល់ប្រាក់ឈ្នួលអប្បបរមាដល់កម្មករ១៧០ដុល្លារចាប់ពីខែមករានេះទៅ មិនឲ្យម្ចាស់ផ្ទះដំឡើងថ្លៃ ការតទឹកភ្លើងដល់ផ្ទះជួលដើម្បីកាត់បន្ថយការចំណាយ សេវាព្យាបាលឥតបង់ថ្លៃតាមរយៈបេឡាជាតិរបបសន្តិសុខសង្គមជាដើម៕
