មន្ត្រីជាន់ខ្ពស់គណបក្សសង្គ្រោះជាតិបញ្ជាក់ជំហរនៅថ្ងៃសុក្រនេះថា គណបក្សនេះអាចនឹងដូរឬដកពាក្យ “ដូរមេឃុំបម្រើបក្ស ដាក់មេឃុំបម្រើរាស្ត្រ” បើសិនជាតុលាការរកឃើញថា ពាក្យពេជន៍នេះធ្វើឲ្យប៉ះពាល់ដល់សង្គមពិតប្រាកដមែននោះ។
កាលពីថ្ងៃទី២ ខែមីនា គណបក្សប្រឆាំងប្រកាសថា គោលនយោបាយជាអថិភាព៥ចំនុច មានទាំងពាក្យថា «ដូរមេឃុំបម្រើបក្ស ដាក់មេឃុំបម្រើរាស្ត្រ» នឹងត្រូវយកទៅឃោសនារកសំឡេងឆ្នោត ដើម្បីជ្រើសរើសក្រុមប្រឹក្សាឃុំសង្កាត់នាពេលខាងមុខ។
ប៉ុន្តែសារនយោបាយនេះ ត្រូវគណបក្សប្រជាជនកម្ពុជាថ្កោលទោសនិងគំរាមប្តឹងទៅតុលាការ ដោយចោទថា មានលក្ខណៈញុះញង់និងប្រមាថដល់មេឃុំឬចៅសង្កាត់ ដែលខិតខំបំពេញការងារបម្រើពលរដ្ឋ។
នៅថ្ងៃទី១៧ខែមីនានេះ ប្រធានក្រុមតំណាងរាស្ត្រគណបក្សសង្គ្រោះជាតិ លោក សុន ឆ័យ ប្រាប់អ្នកសារព័ត៌មាន ក្រោយចូលសួរសុខទុក្ខសកម្មជនរបស់ខ្លួននៅពន្ធនាគារព្រៃសថា គណបក្សនេះនឹងពិចារណាដកពាក្យនេះចេញវិញ បើតុលាការឬមន្ត្រីជំនាញមិនអនុញ្ញាតិឲ្យប្រើក្នុងអំឡុងពេលឃោសនាបោះឆ្នោត។
លោកថា៖ «ភាសាអង់គ្លេសគេថា ស្លូហ្វែនហៅថា ពាក្យស្លោក [«ដូរមេឃុំបក្សដាក់មេឃុំបម្រើរាស្ត្រ»]។ ពាក្យស្លោក មិនមែនជាពាក្យអី ជាផ្លូវការធ្វើឲ្យពិបាកនឹងដោះស្រាយទេ ប្រសិនបើតុលាការ ឬក៏ស្ថាប័នមានសមត្ថកិច្ចពាក់ព័ន្ធថា ពាក្យស្លោកឃោសនាហ្នឹង វាប៉ះពាល់ វាអត់ត្រឹមត្រូវអីហ្នឹង គឺគណបក្សសង្គ្រោះជាតិនឹងសម្រេចទៅតាមហ្នឹង មិនរឹងទទឹងទេ។ ក៏ប៉ុន្តែ ការផ្សព្វផ្សាយ វាបានអីហ្នឹង វាដល់គ្រប់ទិសទីអស់ទៅហើយ យើងទៅដកមកវិញកុំឲ្យឭពាក្យហ្នឹងក៏អត់កើត។ ប៉ុន្តែគណបក្សសង្គ្រោះជាតិ នឹងរៀបចំគោលនយោបាយ៥ចំនុច ហ្នឹងឡើងវិញ ដោយមិនបញ្ចូលពាក្យស្លោកហ្នឹងទេ»។
អ្នកនាំពាក្យគណបក្សប្រជាជនកម្ពុជាលោក សុខ ឥសាន អះអាងថា ការលើកឡើងរបស់លោក សុន ឆ័យលោកថា ជាសារវិជ្ជមានមួយ ដែលគណបក្សប្រជាជនចង់បាន។
លោកថា៖ «យើងអត់មានចេតនាអាក្រក់អី ចង់ប្តឹងគាត់ទេ បើគាត់ដកហើយ វាជាកាល្អ ហើយយើងស្វាគមន៍។ តាមពិតទៅគោណបំណង [បក្សប្រជាជន] មិនចង់ឲ្យមានអរិភាព [ភាពប្រសើរ] ក្នុងសង្គមដែលពាក់ព័ន្ធនឹងមេឃុំច្រើនរយច្រើនពាន់នាក់ហ្នឹងដែរ។ អញ្ចឹង មិនគួនឹងដាក់អាហ្នឹង [មេឃុំបម្រើបក្សដាក់មេឃុំបម្រើរាស្ត្រ] ទេ»។
សារនយោបាយ «ដូរមេឃុំបម្រើបក្សដាក់មេឃុំបម្រើរាស្ត្រនេះ» គណបក្សសិទ្ធិមនុស្សដែលដឹកនាំដោយលោក កឹម សុខា នៅពេលនោះ ធ្លាប់ប្រើប្រាស់អំឡុងឃោសនារកសំឡេងឆ្នោតជ្រើសរើសក្រុមប្រឹក្សាឃុំ-សង្កាត់តាំងពីអាណត្តិមុន។
ប៉ុន្តែសារនយោបាយមួយនេះ បក្សកាន់អំណាច ហាក់មិនចាប់អារម្មណ៍ និងព្រមានប្តឹងផ្តល់ ឡើងដល់តុលាការ ដូចពេលនេះទេ។
យ៉ាងណាក៏ដោយ អ្នកតាមដានសង្គមបានបង្ហាញទស្សនៈផ្សេងគ្នា ទៅលើការលុបចោលសារនយោបាយថា «ដូរមេឃុំបក្ស ដាក់មេឃុំបម្រើរាស្ត្រនេះ»។
អ្នកខ្លះយល់ថា ការលុបចោលសារនយោបាយនេះ អាចធ្វើឲ្យអ្នកគាំទ្រខ្លះយល់ថាបក្សប្រឆាំង ហាក់មានជំហរ ទន់ជ្រាយ តាមការគំរាម របស់បក្សកាន់អំណាច។ ប៉ុន្តែអ្នកខ្លះទៀត យល់ថា ការកែសម្រួលនេះ ធ្វើឲ្យស្ថានការនយោបាយវិលទៅរកភាពស្ងប់ស្ងាត់ ធានាដល់ដំណើរការបោះឆ្នោត ដែលជិតមកដល់៕
