លោក សុខ អាន ជាឧបនាយករដ្ឋមន្រ្តីដែលទទួលមរណៈភាពក្នុងអាយុ៦៦ឆ្នាំ បានកាន់មុខតំណែងជាច្រើនក្នុងស្ថាប័នរដ្ឋ។ លោកជាមនុស្សទី១៤ក្នុងជួរគណបក្សប្រជាជនកម្ពុជាដែលកាន់អំណាចជាង៣០ឆ្នាំមកនេះ។លោកក៏ជាមនុស្សមានសមត្ថភាពខ្ពស់ជាងគេម្នាក់ក្នុងជួរគណបក្សនេះតាំងពីដំបូង។
តាមគេហទំព័រ Wikipedia បង្ហាញថា លោក សុខ អាន បានកាន់កាប់មុខតំណែងយ៉ាងតិច១០កន្លែង។ មុខដំណែងសំខាន់ៗ ក្រៅពីសមាជិករដ្ឋសភានិងជារដ្ឋមន្រ្តីទីស្តីការគណៈរដ្ឋមន្រ្តីនោះ លោក សុខ អាន មានតួនាទីជា៖
- ប្រធានក្រុមប្រឹក្សាកំណែទម្រង់រដ្ឋបាល
- ប្រធានអាជ្ញាធរអប្សារា
- ប្រធានអាជ្ញាធរជាតិប្រេងកាតកម្ពុជា
- ប្រធានអាជ្ញាធរជាតិដោះស្រាយទំនាស់ដីធ្លី
- ប្រធានគណៈកម្មាធិការទទួលស្គាល់គុណភាពអប់រំ នៃកម្ពុជា
- ប្រធានក្រុមប្រឹក្សាភិបាលរាជបណ្ឌិតសភាវិជ្ជាជីវៈតុលាការ
- ប្រធានក្រុមការងារដើម្បីកាត់ទោសខ្មែរក្រហម
- ក្រុមប្រឹក្សាភិបាលសាលាភូមិន្ទរដ្ឋបាល
- ប្រធានគណៈកម្មាធិការជាតិអវិនិយោគរបស់រដ្ឋ លើសហគ្រាសចំការកៅស៊ូ ក្រុមហ៊ុនសំភារៈកសិកម្ម និង ក្រុមហ៊ុនជលផល
- អនុប្រធានវិទ្យាស្ថាន Centralist Democratic Institute, CDI, Asia Pacific ។
នៅតាមបណ្តាញសង្គម មានការរិះគន់ជាបន្តបន្ទាប់ដោយប្រៀបធៀប លោក សុខ អាន ទៅនឹងព្រះនរាយណ៍ដែលមានដៃ១០។ ប៉ុន្តែនៅរយៈពេលប៉ុន្មានឆ្នាំចុងក្រោយនេះ តួនាទីលោក សុខ អាន បានកើនឡើងរហូតដល់ជាង២០ស្ថាប័នជាតិ។ នេះដោយយោងតាមបណ្តាញផ្សព្វផ្សាយមួយចំនួន។
អ្នកតាមដានសង្គមមួយចំនួន លើកឡើងថា ក្រោយការស្លាប់របស់ «បក្សជន» ដែលមានឥទ្ធិពលរូបនេះអាចធ្វើឲ្យមានការប្រែប្រួលទាំងផ្ទៃក្នុងខ្លះរបស់គណបក្សប្រជាជនកម្ពុជា ហើយក៏មានការប្រែប្រួលផងដែរចំពោះមុខដំណែងនិងតួនាទីក្នុងស្ថាប័នរដ្ឋសំខាន់ៗ។
លោកបណ្ឌិត មាស នី អ្នកស្រាវជ្រាវពីការអភិវឌ្ឍន៍សង្គម នៅរង់ចាំមើលដែរថា នឹងមានការប្រែប្រួលអ្វីខ្លះក្រោយពីអវត្តមានមនុស្សម្នាក់ដែលកាន់តួនាទីរាប់សិបកន្លែងនោះ។
លោកថា «យើងកំពុងមានការជជែកពីរឿងអស់ហ្នឹងច្រើនទាក់ទងនឹងធនធានមនុស្សក្នុងគណបក្សប្រជាជន។យើងទទួលស្គាល់ថាគណបក្សនេះរឹងមាំមែនប៉ុន្តែដូចយើងធ្លាប់ឮហើយសម្តេចនាយកធ្លាប់មានប្រសាសន៍ថា បើអត់ពីគាត់ទៅមិនមានអ្នកណាដឹកនាំគណបក្សប្រជាជន ដឹកនាំប្រទេសបានទៀតទេ។ ជាសញ្ញាមួយប្រាប់ថាធនធានមនុស្សប្រហែលជាមិនសូវសំបូរប៉ុន្មានទេនៅថ្នាក់ខាងលើមជ្ឈឹមបក្ស។ ការបាត់បង់ឯកឧត្តម សុខ អាន ក៏ជាការបាត់បង់ គេហៅសភាចារ្យបុរសមួយក្នុងគណបក្សប្រជាជន ហើយយើងមើលទៅបាត់បង់ជាបន្តបន្ទាប់នោះ សុទ្ធជាមនុស្សសំខាន់ៗ»។
ដោយចូលរួមរំលែកទុក្ខផងនោះ លោកបណ្ឌិត សាម អ៊ិន មានប្រសាសន៍ថា ការស្លាប់របស់លោក សុខ អាន គឺជាការបាត់បង់អ្នកយុទ្ធសាស្ត្រដ៍សំខាន់មួយរបស់គណបក្សកាន់អំណាចមួយនេះ។
លោកមានប្រសាសន៍ថា «ការបាត់បង់រូបលោក យើងគិតថាអាចបាត់បង់អ្នកយុទ្ធសាស្ត្រសំខាន់មួយរបស់គណបក្សប្រជាជន ប៉ុន្តែខ្ញុំមិនអាចដឹងថាគណបក្សប្រជាជនមានអ្នកជំនួសលោកឧបនាយករដ្ឋមន្រ្តី សុខ អាន ក្នុងកម្រិតណា? យើងគ្រាន់តែដឹងថា លោកមានស្នាដៃធំធេងក្នុងការកំណត់យុទ្ធសាស្ត្ររបស់គណបក្សប្រជាជន»។ លោកបន្តថា «ចំពោះរឿងជាតិ យើងសង្កេតឃើញថា ស្នាដៃលេចធ្លោមួយរបស់លោកឧបនាយករដ្ឋមន្រ្តី សុខ អាន គឺការទាមទារបញ្ចូលប្រាសាទវិហារជាសម្បត្តិបេតិកភ័ណ្ឌពិភពលោក»។
មតិមួយចំនួនលើកឡើងថា រដ្ឋាភិបាលគួរយកតួនាទីរបស់លោក សុខ អាន ដែលកាន់កាប់ស្ថាប័នជាតិជាច្រើនលើសលប់នោះ ប្រគល់ឲ្យយុវជនជំនាន់ក្រោយដែលមានសមត្ថភាពជាអ្នកដឹកនាំវិញម្តង។
លោក មាស នី វិភាគថាអស់ពីលោក សុខ អាន ទៅរដ្ឋាភិបាលអាចកំណែទម្រង់ខ្លះទៀតក្នុងការដឹកនាំរដ្ឋាភិបាល។
លោកថា «វាត្រូវតែធ្វើហើយ។ ខ្ញុំមិនជឿថា គេយកមនុស្សណាម្នាក់ឲ្យធ្វើមន្រ្តីដៃ១០០ចឹងទៀតទេ ប្រាកដជាមានការកាត់ឲ្យទៅខាងមន្រ្តីផ្សេងៗឬក៏រំលាយចោលយន្តការដែលក្រោមការគ្រប់គ្រងរបស់ឯកឧត្តម សុខ អាន មួយចំនួនធំហើយឲ្យទៅតាមក្រសួងវិញ»។
លោក សាម អ៊ិន វិញយល់ថា បើទោះជាមានការកែទម្រង់ក្នុងស្ថាប័នរដ្ឋបានខ្លះក្រោយពីលោក សុខ អាន ស្លាប់តែលោកមិនរំពឹងថាមានការផ្លាស់ប្តូរជាទ្រង់ទ្រាយធំនោះទេ។
លោកវិភាគថា «បើសិនជាការបែងចែកតួនាទីជាច្រើនហ្នឹងទៅឲ្យយុវជនឬក៏អ្នកជំនាន់ថ្មីដែលមានគំនិតជឿនលឿន និងមានគំនិតផ្តួចផ្តើមច្រើនសម្រាប់កែទម្រង់ ខ្ញុំគិតថាជារឿងល្អសម្រាប់បប្រព័ន្ធអភិបាលស្រុកខ្មែរ។ ប៉ុន្តែយ៉ាងណាក៏ដោយ នឹងមិនមានផ្លាស់ប្តូរជាដុំកំភួនទេ។ វាអាចជាការផ្លាស់ប្តូរកម្រិតបច្ចេកទេសក្នុងទីតាំងគាត់ធ្លាប់កាន់ពីមុនមក»។
កាលពីលោក សុខ អាន សម្រាកព្យាបាលនៅក្រៅប្រទេស តំណែងជារដ្ឋមន្រ្តីទីស្តីការគណៈរដ្ឋមន្រ្តីគឺធ្លាក់ទៅលើ លោក ប៊ុន អ៊ុយ ជារដ្ឋលេខធិការឡើងធ្វើជារដ្ឋមន្រ្តីស្តីទី។ ក្នុងឋានៈជារដ្ឋមន្រ្តីស្តីទី លោក ប៊ុន អ៊ុយ បានស្នើថវិកាជាតិប្រហែល៧៥ដុល្លារដើម្បីរៀបចំបុណ្យសព លោក សុខ អាន។
ការចំណាយថវិកាជាតិច្រើនបែបនេះត្រូវរងការរិះគន់ពីសំណាក់តំណាងរាស្ត្របក្សប្រឆាំងនិងអ្នកប្រើប្រាស់បណ្តាញសង្គមហ្វេសប៊ុក។ ប៉ុន្តែអ្នកនាំពាក្យទីស្តីការគណៈរដ្ឋមន្រ្តី បានការពារថា លោក សុខ អាន មានគុណតម្លៃបម្រើការងារជាតិបានច្រើនជាងថវិកា៧៥ម៉ឺនដុល្លារនោះទៅទៀត។
កាលពីថ្ងៃទី១៦ខែមីនា ពោលមួយថ្ងៃក្រោយពីលេចធ្លាយសំណើចាយថវិកាជាតិប្រហែល៧៥ម៉ឺនដុល្លារនោះ លោកនាយករដ្ឋមន្រ្តី ហ៊ុន សែន បានតែងតាំងលោកឧបនាយករដ្ឋមន្រ្តី ប៊ិន ឈិន ឲ្យធ្វើជារដ្ឋមន្រ្តីស្តីទីនៃទីស្តីការគណៈរដ្ឋមន្រ្តីវិញម្តង។ ប៉ុន្តែតួនាទីផ្សេងទៀត រដ្ឋាភិបាលនៅមិនទាន់ប្រកាសតែងតាំងអ្នកណាមកជំនួសលោក សុខ អាន នៅឡើយ៕