មន្ត្រីទូតអាមេរិកប្រចាំនៅអង្គការសហប្រជាជាតិ លោកស្រី Nikki Haley ថ្លែងថា ប្រសិនជាប្រទេសណាមួយគាំទ្រកូរ៉េខាងជើងគឺបង្ហាញថា ប្រទេសនោះគាំទ្រឲ្យមានភាពគ្រោះថ្នាក់នៅក្នុងតំបន់ ហើយអាចនឹងត្រូវទទួលទណ្ឌកម្មផង។
ក្នុងពេលដែលបរាជ័យសម្រាប់ការជំរុញឲ្យអង្គការសហប្រជាជាតិដាក់ទណ្ឌកម្មបន្ថែមលើកូរ៉េខាងជើង លោកស្រី Haley ចោទជាសំនួរទៅកាន់ប្រទេសផ្សេងទៀតថា តើគាំទ្រអង្គការសហប្រជាជាតិឬ គាំទ្រកូរ៉េខាងជើង។ លោកស្រីថ្លែងក្នុងពេលមានការកោះប្រជុំបន្ទាន់មួយ នៅក្រុមប្រឹក្សាសន្តិសុខអង្គការសហប្រជាជាតិ ក្រោយពេលកូរ៉េខាងជើងបាញ់សាកល្បងអាវុធមីស៊ីលកាលពីថ្ងៃអាទិត្យ។ នេះ បើតាមសារព័ត៌មានBBC។
កាលពីថ្ងៃអង្គារ អង្គការសហប្រជាជាតិមិនបានដាក់ទណ្ឌកម្មអ្វីបន្ថែមលើ កូរ៉េខាងជើងទេ គ្រាន់តែព្រមានថា អាចនឹងមានការដាក់ទណ្ឌកម្មបន្ថែមទៀត។
កូរ៉េខាងជើងបញ្ជាក់ថា មីស៊ីលឆ្លងទ្វីបដែលបាញ់កាលពីថ្ងៃអាទិត្យនោះគឺជាបច្ចេកវិទ្យាចុងក្រោយមានការរីកចម្រើន អាចនាំក្បាលគ្រាប់នុយក្លេអ៊ែធំជាងមុន។
ថ្លែងនៅពេលបិទបញ្ចប់ការប្រជុំនៅអង្គការសហប្រជាជាតិលោកស្រី Haley ថ្លែងថា ប្រទេសដែលបន្តគាំទ្រកូរ៉េខាងជើងគឺត្រូវឈប់ជាបន្ទាន់ បើមិនដូច្នោះទេ នឹងត្រូវទទួលរងការចាត់វិធានការ ឬ ជាគោលដៅនៃការដាក់ទណ្ឌកម្ម៕
