បុរសម្នាក់រស់នៅសហរដ្ឋអាមេរិកគឺលោក ប្រេឌី អេន យ៉ាំង(Brady N Young) បានប្រកាសថាលោកត្រៀមទទួលទោសករណីលោកដែលស្នើឲ្យមានការពិនិត្យឌីអិនអេ (DNA) រវាងលោក ហ៊ុន សែន និងលោក ហ៊ុន ម៉ាណែត ដោយលោកមានការសង្ស័យថាមានជាប់ឈាមជាមួយអតីតមេដឹកនាំវៀតណាម។
នៅក្នុងវីដេអូឃ្លីបដែលផ្សព្វផ្សាយកាលពីថ្ងៃទី១៦ ខែមិថុនា លោក ប្រេឌី ថាលោកគ្រាន់តែសំណូមពរឲ្យមានការជម្រះនូវមន្ទិលសង្ស័យដែលថា លោក ហ៊ុន ម៉ាណែត មិនមែនជាកូនបង្កើតរបស់លោក ហ៊ុន សែន។ លោកថា៖ «ខ្ញុំគ្រាន់តែសំណូមពរឲ្យលោក(ហ៊ុន សែន)និង ហ៊ុន ម៉ាណែត ធ្វើឌីអិនអេតែប៉ុណ្ណោះ ហេតុអីបានលោកថាទៅជាការប្រមាថមើលងាយធ្វើឲ្យក្រុមគ្រួសារលោកឈឺចាប់ទៅវិញ?»។
នៅក្នុងវីដេអូដដែលលោក ប្រេឌី បន្តថាលោកមិនដឹងថាលោក ហ៊ុន សែន កំពុងខឹងបុគ្គលណាប្រាកដទេ ដោយលោកថាមិនដឹងខឹងលោកឬខឹងគណបក្សសង្គ្រោះជាតិ។
លោកបញ្ជាក់ទៀតថាបើកំហុសនោះជារបស់គាត់ លោកនឹងព្រមទទួលទោសនិងធ្វើតាមអ្វីដែលលោក ហ៊ុន សែន ចង់បាន បើសិនលោក ហ៊ុន សែន ព្រមដោះលែងសកម្មជនទាំង១៩រូបរបស់គណបក្សប្រឆាំង។ លោកថា៖ «បើសិនជាលោកចង់ឲ្យខ្ញុំទៅទទួលទោស ខ្ញុំអាចទៅទទួលទោស ចង់ឲ្យខ្ញុំទៅស្រុកខ្មែរក៏ខ្ញុំទៅបានដែរ ខ្ញុំទៅទទួលទោស ខ្ញុំទៅសារភាពនៅក្រសួងមហាផ្ទៃក៏បាន ក៏ប៉ុន្តែលោកត្រូវតែដោះលែងសកម្មជន១៩នាក់ដែលកំពុងជាប់ពន្ធនាគារ»។
ការលើកឡើងនេះគឺបន្ទាប់ពីលោក ហ៊ុន សែន បានថ្លែងថាគណបក្សសង្រ្គោះជាតិនិងសកម្មជនរបស់បក្សបានចោទភរិយារបស់លោកជាប្រពន្ធរបស់មេដឹកនាំវៀតណាមម្នាក់និងមានកូនប្រុសម្នាក់គឺលោក ហ៊ុន ម៉ាណែត ជាកូនរបស់លោក ឡេដឹក ថូ។ លោកថានេះជាការប្រមាថដែលមិនអាចអត់ឱនឲ្យបាននោះទេ៕
