ទីភ្នាក់ងារវិទ្យាសាស្ត្រដ៏ធំមួយរបស់អូស្ត្រាលី បាននិយាយកាលពីថ្ងៃម្សិលមិញថា ទីភ្នាក់ងារនេះជឿជាក់ថា យន្តហោះម៉ាឡេស៊ីដែលបានបាត់ខ្លួនកាលពីឆ្នាំ២០១៤នោះ បានធ្លាក់ចូលនៅក្នុងសមុទ្រនៅភាគឦសាននៃតំបន់មួយ ដែលត្រូវទឹកសមុទ្រវាយបំផ្លាញ បណ្ដាលឲ្យការស្វែងរកយន្តហោះនោះរយៈពេល ២ឆ្នាំពុំទទួលបានលទ្ធផលអ្វីសោះ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
សេចក្ដីសន្និដ្ឋានរបស់ទីភ្នាក់ងារនេះ គឺផ្អែកទៅលើរូបភាពផ្កាយរណបដែលថតបាននៅក្នុងរយៈពេល ២សប្ដាហ៍ក្រោយពីយន្តហោះម៉ាឡេស៊ី MH370 បានបាត់ខ្លួន កាលពីថ្ងៃទី០៨ ខែមីនា ឆ្នាំ២០១៤ ដោយនាំទៅជាមួយនូវមនុស្ស ២៣៩នាក់ ដែលស្ថិតក្នុងដំណើរពីទីក្រុងគួឡាឡុំពួ ទៅកាន់ទីក្រុងប៉េកាំង។
Reuters បានចុះផ្សាយថា ប៉ុន្តែ រដ្ឋាភិបាលអូស្ត្រាលីបានច្រានចោលសេចក្ដីសន្និដ្ឋានអង្គការស្រាវជ្រាវឧស្សាហកម្ម និងវិទ្យាសាស្ត្រខំមិនវែល (CSIRO) ដែលចេញផ្សាយក្នុងរបាយការណ៍មួយកាលពីថ្ងៃម្សិលមិញនេះ ដោយរដ្ឋាភិបាលអូស្ត្រាលីថា របាយការណ៍នោះមិនទាន់ជាក់លាក់គ្រប់គ្រាន់នោះឡើយ។
ការបាត់ខ្លួននៃយន្តហោះ Boeing 777 របស់ម៉ាឡេស៊ី បានក្លាយជារឿងអាថ៌កំបាំងបំផុតនៅក្នុងប្រវត្តិសាស្ត្រអាកាសចរណ៍របស់ពិភពលោក។ យន្តហោះនេះ ត្រូវបានគេជឿថា បានបត់ក្បាលត្រឡប់មកវិញ ហើយបាត់ខ្លួននៅភាគខាងត្បូងមហាសមុទ្រឥណ្ឌា មុននឹងធ្លាក់នៅឆ្នេរភាគខាងលិចប្រទេសអូស្ត្រាលី។
អូស្ត្រាលី ម៉ាឡេស៊ី និងចិន បានចំណាយប្រាក់ដល់ទៅ ១៦០លានដុល្លារដើម្បីស្វែងរកយន្តហោះនេះ ប៉ុន្តែ បានបញ្ឈប់ប្រតិបត្តិការនេះកាលពីខែមករាដើមឆ្នាំនេះ បន្ទាប់ពីរកមិនឃើញអ្វីសោះ បើទោះបីជាមានការតវ៉ាពីក្រុមគ្រួសារសាច់ញាតិអ្នកបាត់ខ្លួននៅលើយន្តហោះនោះក៏ដោយ៕