នាយករដ្ឋមន្ត្រីកម្ពុជារំឭកឲ្យបន្តរក្សាទំនាក់ទំនងល្អជាមួយប្រទេសវៀតណាមនិងប្រទេសឡាវ ដែលជាប្រទេសជិតខាង ទោះជាលោកធ្លាប់ព្រមានពីសង្គ្រាមជាមួយប្រទេសឡាវ ពីជម្លោះព្រំដែនក៏ដោយ។ នេះបើតាមខ្លឹមសារនៅលើហ្វេសប៊ុករបស់នាយករដ្ឋមន្ត្រី។
លោក ហ៊ុន សែន នៅសប្តាហ៍មុន បានប្រកាសប្រើកម្លាំងកងព័ទ រុញច្រានកងទ័ពឡាវមួយក្រុមចេញពីទឹកដីកម្ពុជាក្នុងខេត្តស្ទឹងត្រែង។
ប៉ុន្តែការព្រមានរបស់នាយករដ្ឋមន្ត្រីកម្ពុជានេះ មិនឈានដល់ការផ្ទុះអាវុធទេ ដោយសារតែភាគីឡាវ ព្រមដកកងទ័ពរបស់ខ្លួនចេញពីកម្ពុជាមុនថ្ងៃកំណត់។
លោក ហ៊ុន សែន បានប្រាប់មន្ត្រីក្រោមឱវាទនៅខេត្តស្ទឹងត្រែង កាលពីថ្ងៃទី១៦ខែសីហាថា ការដែលឡាវយល់ព្រមដកកងទ័ពចេញពីទឹកដីកម្ពុជា ដោយសន្តិវិធី បានបញ្ជៀសសង្គ្រាមទាំងស្រុង។ លោកថាការសម្រេចចិត្ត របស់ឡាវនេះ ជាបំណងរបស់កម្ពុជា មិនចង់ឲ្យមានការបង្ហូរឈាម។
លោកថា «កន្លងទៅនេះ ដែលភាគីឡាវបានយល់ព្រមដកកងទ័ពចេញពីទឹកដីកម្ពុជាដោយសន្តិវិធី ដែលបានបញ្ជៀសសង្គ្រាមទាំងស្រុង។ កម្ពុជាធ្លាប់បានឆ្លងកាត់សង្រ្គាមជាច្រើនឆ្នាំមកហើយ គឺយើងមិនចង់ឃើញសង្គ្រាមតទៅទៀតទេ»។
លោក ហ៊ុន សែន ក៏បានអំពាវឲ្យពលរដ្ឋខ្មែរ ត្រូវបន្តរក្សាទំនាក់ទំណងល្អជាមួយពលរដ្ឋវៀតណាមនិងឡាវ ជាពិសេសអ្នករស់នៅតាមបណ្តាលព្រំដែន ដោយថាដើម្បីកុំឲ្យប៉ះពាល់ដល់ប្រយោជន៍ប្រជាពលរដ្ឋទាំងសងខាង។
សាស្រ្តាចារ្យវិទ្យាសស្ត្រនយោបាយ លោក សូ ចន្ថា វិភាគថា សារអំពាវនាវនេះ អាចជាការរំឭកដល់ភាពជោគជ័យរបស់កម្ពុជា តាមរយៈចរចាការទូតដែលបានបញ្ចៀសការបង្ហូរឈាមគ្នាជាមួយប្រទេសឡាវ ពីបញ្ហាព្រំដែននេះ។
មួយវិញទៀតលោកថា សូ ចន្ថា វិភាគថា សារអំពាវនាវរបស់នាយករដ្ឋមន្ត្រីពេលនេះ ក៏ជាសាររំឭកដល់មន្ត្រីក្រោមឱវាទ ឲ្យប្រុងប្រយ័ត្ន ទប់ស្កាត់កុំឲ្យមានចលនាជាតិនិយមណាកើតឡើង ដូចករណីដុតស្ថានទូតថៃកន្លងទៅ ដែលលោកថាធ្វើឲ្យប្រទេសជាតិខាតបង់និងបង្កើតបញ្ហាកាន់តែធ្ងន់ធ្ងរជាមួយប្រទេសជិតខាង។
លោកថា៖ «ក្នុងនាមប្រទេសជាភូមិផងរបងជាមួយ កម្ពុជាមិនអាចចាត់ទុកប្រទេសជិតខាងជាសត្រូវ ហើយត្រូវតែធ្វើសង្គ្រាមនោះទេ អញ្ចឹងត្រូវតែប្រកាន់នយោបាយការបរទេស ដែលមានការយោគយល់ មានការអធ្យាស្រ័យគ្នា ចាត់ទុកគ្នាមិត្តទាំងអស់គ្នាក្របខណ្ឌអាស៊ានទាំងមូលនោះ»។
អ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី លើកឡើងថា ការអំពាវនាវឲ្យពលរដ្ឋនៅតាមព្រំដែនបន្តទំនាក់ទំនងល្អជាមួយប្រទេសជិតខាង លោកថាជាការរំលត់បញ្ហានៅតាមព្រំដែនផងនិងថាដើម្បីរក្សាបាននូវការរកចំណូលប្រចាំថ្ងៃរបស់ពលរដ្ឋដែលរស់នៅតាមព្រំដែនផងដែរ។
ប៉ុន្តែលោក មាស នី ជំរុញឲ្យរដ្ឋាភិបាល គួរបង្កើតហេដ្ឋារចនាសម្ព័ន្ធនិងបង្កើតតំបន់សេដ្ឋកិច្ចនៅតាមព្រំដែន បន្ថែមទៀត ទើបជាប្រសិទ្ធភាពការពារបូរណភាពទឹកដីបានយូរអង្វែង។
លោកថា៖ «ព្រោះសន្តិភាពវាចាប់ផ្តើមចេញពីពលរដ្ឋនៅតាមព្រំដែន បើសិនជាពលរដ្ឋនៅតាមព្រំដែនមិនមានការទុកចិត្តគ្នាទេ ពេលនោះវានឹងអាចរឿងតូចមួយខ្លាយជារឿងធំ តែជារឿងធម្មតាដែលប្រទេសនីមួយៗត្រូវតែគិត។ ប៉ុន្តែការដែលគ្រាន់តែអំពាវនាវប៉ុណ្ណឹង វាមិនគ្រប់គ្រាន់ទេ រដ្ឋាភិបាលត្រូវផ្តោតលើផែនការអភិវឌ្ឍជាតិ សម្រាប់ព្រំដែនហ្នឹងផងទៅ ដើម្បីជួយលើកទឹកចិត្តឲ្យពលរដ្ឋខ្មែរយើងទៅរស់នៅតាមបណ្តោយព្រំដែនកាន់តែច្រើនទៅ ពេលនោះយើងយកមនុស្សធ្វើរបង ពេលនោះទៅថ្ងៃអនាគត បញ្ហាព្រំដែនគេមិនអាចរំលោភបំពានអីបានទៀត»។
ទោះជាយ៉ាងណា លោក ហ៊ុន សែន បញ្ជាក់ថា «ទន្ទឹមនឹងជោគជ័យនៃដំណោះស្រាយខាងលើនេះហើយ សម្តេចតេជោ ហ៊ុន សែន បានសម្រេចបង្កើតកងពលតូចថ្មើរជើងថ្មីលេខ១២៨ ដើម្បីពង្រឹងបន្ថែមនូវការពារបូរណភាពទឹកដី និងថែរក្សានូវសុវត្ថិភាពជូនប្រជាពលរដ្ឋខេត្តស្ទឹងត្រែង ជាពិសេសបងប្អូនដែលរស់នៅតាមព្រំដែនកម្ពុជា-ឡាវ និងវៀត ណាម»។
