រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានថ្លែងថា កម្ពុជាបានត្រៀមខ្លួនរួចហើយសម្រាប់ការផ្តាច់ជំនួយ ឬ ដាក់ទណ្ឌកម្មផ្សេងៗពីសហគមន៍អន្តរជាតិដោយថាបច្ចុប្បន្នត្រូវការជំនួយបរទេសតែប្រមាណ២០%ប៉ុណ្ណោះសម្រាប់ដំណើរការការងាររបស់រដ្ឋាភិបាល។
លោក អូន ព័ន្នមុនីរ័ត្ន បានថ្លែងនៅក្នុងសភាជាតិកម្ពុជាថារដ្ឋាភិបាលកម្ពុជាបានត្រៀមខ្លួនរួចហើយប្រសិនជាបរទេសកាត់ផ្តាច់ជំនួយនិងបិទការនាំទំនិញចេញពីកម្ពុជា។ លោកបញ្ជាក់ថា បញ្ហាទាំងនេះអាចដោះស្រាយព្រោះបច្ចុប្បន្នកម្ពុជាពឹងជំនួយបរទេសតែ២០%ប៉ុណ្ណោះ។
លោកថា៖ « ក្រៅតែពីលទ្ធភាពនៃការកើនឡើងរចនាសម្ព័ន្ធនៃថវិកាជាតិតែម្តង ការដែលយើងមានឯករាជ្យភាពដែលយើងលែងពឹងផ្អែកទៅលើជំនួយបរទេសនេះ យើងក៏នៅមានធនធានមួយទៀតទាក់ទងនឹងផ្នែកធនធានបំរុង សម្រាប់ធានាគ្រប់គ្រងសភាពការនៅពេលមានវិបត្តិសេដ្ឋកិច្ចឬហិរញ្ញវត្ថុជាយថាហេតុ » ។
ទោះជាយ៉ាងណាលោកក៏បានលើកឡើងដែរថាវិបត្តិក៏អាចនឹងកើតឡើងផងដែរប្រសិនជាបរទេសកាត់ផ្តាច់ជំនួយ និងបិទការនាំចេញមែននោះ តែលោកថាទំនាក់ទំនងពាណិជ្ជកម្មគឺខុសពីទំនាក់ទំនងនយោបាយដែលថាការធ្វើពាណិជ្ជកម្មជាមួយបរទេសគឺអាចនៅដដែល បើទោះបីនយោបាយមានភាពរកាំរកូសក៏ដោយ។
នាយកប្រតិបត្តិសម្ព័ន្ធគណនេយ្យភាពសង្គមលោក សន ជ័យ មានប្រសាសន៍ថាឥទ្ធិពលនៃជំនួយបរទេសនេះមិនត្រឹមតែទាក់ទងជាជំនួយជាសាច់ប្រាក់នោះទេ តែវាជាជំនួយទាក់ទងនឹងការវិនិយោគរបស់បរទេសទៀត។ លោកបន្តថា បើបរទេសបិទជំនួយនោះនឹងធ្វើឲ្យពលរដ្ឋរងគ្រោះ។
លោកថា៖ « បើសិនជាមានទំនាក់ទំនងល្អក់កករជាមួយអន្តរជាតិ ខ្ញុំបារម្ភថានឹងអាចកើតមានដល់វិបត្តិហិរញ្ញវត្ថុ ឬក៏អាចប៉ះពាល់ដល់ភាពគ្មានការងារធ្វើនោះដែរ បើសិនជាភាពគ្មានការងារធ្វើជួបប្រទះនួវបញ្ហាសកម្មភាពសេដ្ឋកិច្ចមួយចំនួនទៀតដូចជាអចលនទ្រព្យ ដូចជាការការវិនិយោគទៅលើវិស័យផ្សេងៗទៀតហ្នឹងក៏វាអាចមានផលប៉ះពាល់ ហើយអ្វីដែលលើសពីនេះគឺការនាំចេញការអនុគ្រោះពន្ធនាំចេញទៅអាមេរិក និងអឺរ៉ុបហ្នឹងដែរ »។
គួរបញ្ជាក់ថា បន្ទាប់ពីតុលាការកំពូល បានសម្រេចរំលាយគណបក្សសង្គ្រោះជាតិកាលពីថ្ងៃព្រហស្បតិ៍ម្សិលមិញ ធ្វើឲ្យមានប្រតិកម្មរិះគន់ និងថ្កោលទោសពីមជ្ឈដ្ឋានអន្ដរជាតិជាហូរហែមានជូចជា សហរដ្ឋអាមេរិក សហភាពអឺរ៉ុប និងចក្រភពអង់គ្លេសជាដើម ដោយប្រទេសមួយចំនួនបានប្រកាសផ្តាច់ជំនួយមកកម្ពុជា៕