រុស្ស៊ី និងជប៉ុន កាលពីថ្ងៃម្សិលមិញ បានបង្ហាញថា ពួកគេមិនអាចឈានដំណោះស្រាយណាមួយឡើយ បន្ទាប់ពីជំនួប២ថ្ងៃ សម្រាប់ស្វែងរកដំណោះស្រាយជម្លោះទឹកដីរាប់ទសវត្សរ៍មកហើយ ដែលបានរាំងស្ទះប្រទេសទាំងពីរមិនឲ្យឈានទៅសម្រេចបានសន្ធិសញ្ញាសន្តិភាពនឹងគ្នា ដើម្បីបញ្ចប់សង្គ្រាមលោកលើកទី ២ ជាផ្លូវការនោះឡើយ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
ប្រធានាធិបតីរុស្ស៊ លោក វ៉្លាឌីមៀ ពូទីន និងនាយករដ្ឋមន្ត្រីជប៉ុន លោក ហ្ស៊ិនហ្ស៊ូ អាបេ បានជួបពិភាក្សាគ្នានៅឯស្រុកកំណើតរបស់លោក អាបេ និងនៅទីក្រុងតូក្យូ នៅក្នុងកិច្ចខិតខំប្រឹងប្រែងថ្មីបំផុត ដើម្បីទម្លុះទម្លាយភាពទាល់ច្រក។
លោក ពូទីន បានថ្លែងនៅក្នុងសន្និសីទសារព័ត៌មានរួមជាមួយលោក អាបេ ថា វាគឺជាគំនិតក្មេងខ្ចីមួយដែលគិតថា អាចដោះស្រាយបញ្ហានៅក្នុងរយៈពេលតែមួយម៉ោងនោះ។
ចំណែកលោក អាបេ វិញ បានថ្លែងថា កិច្ចខិតខំប្រឹងប្រែងនេះ នឹងនៅតែបន្ត បើទោះជាប្រឈមនឹងបញ្ហាលំបាកនៅខាងមុខក៏ដោយ។
អតីតសហភាពសូវៀត បានដណ្ដើមកាន់កាប់កោះចំនួន ៤ នៅភាគខាងជើងនៃឆ្នេរសមុទ្រជប៉ុន នៅក្នុងឆ្នាំ១៩៤៥ ពោលនៅជិតចុងបញ្ចប់នៃសង្គ្រាមលោកលើកទី ២៕