ក្រសួងមហាផ្ទៃនៅថ្ងៃនេះ បានប្រកាសច្រានចោលការចោទប្រកាន់ថា ពន្ធនាគារស្រុកខ្មែរពេលបច្ចុប្បន្ន បានបើកសេរីភាពឲ្យអ្នកទោសឬទណ្ឌិត ដែលជាអ្នកមានទ្រព្យសម្បត្តិច្រើនចេញចូលដោយសេរី។
លិខិតបដិសេធរបស់ក្រសួងមហាផ្ទៃ ចេញផ្សាយនៅថ្ងៃទី១៦ ខែមករា បានច្រានចោលព័ត៌មានរបស់ស្ថាប័ន Fresh News ដែលផ្សាយកាលពីថ្ងៃទី៥ ខែមករា ឆ្នាំ២០១៧ អំពីភាពអនាធិបតេយ្យនៅក្នុងពន្ធនាគារ ដែលអត្ថបទដាក់ចំណងជើងថា ពន្ធនាគារស្រុកខ្មែរក្លាយជាកន្លែងចេញចូលយ៉ាងសេរី សម្រាប់ទណ្ឌិតទ្រព្យមហាសាលាដូចអ្នកស្រី សេង ច័ន្ធដា។
នៅក្នុងលិខិតនោះ អគ្គនាយកដ្ឋានពន្ធនាគារនៃក្រសួងមហាផ្ទៃ ប្រកាសបដិសេធខ្លឹមសារផ្សព្វផ្សាយនេះថា មិនមានប្រភពនិងមូលដ្ឋាននោះទេ។
របាយការណ៍របស់អង្គការឃ្លាំមើលសិទ្ធិមនុស្ស លីកាដូរ កាលពីឆ្នាំ២០១៥ លើកឡើងថា ការរំលោភបំពាន ការរើសអើង ការកេងប្រវ័ញ្ច និងអំពើពុករលួយ ដែលកំពុងបន្តកើតមានឡើង ជាលក្ខណៈប្រព័ន្ធក្នុងពន្ធនាគារក្នុងប្រទេសកម្ពុជា។ របាយការណ៍នោះ ក៏បានលើកឡើងពីបញ្ហា ពន្ធនាគារចង្អៀត រចនាសម្ព័ន្ធគ្រប់គ្រងខ្វះខាត ខ្វះមធ្យោបាយធ្វើដំណើរទៅតុលាការ ខ្វះការអនុវត្តច្បាប់ និងកង្វះសមត្ថភាពខាងចំណេះដឹងក្នុងការចំណោមមន្ត្រីពន្ធនាគារមួយចំនួន៕