ខណៈដែលមហាជនជាច្រើនបញ្ជាក់ថាការទម្លាយចំណងស្នេហ៍រវាងតារាចម្រៀង ពេជ្រ សោភា និងលោក ឆឹម សក្កដា ជាតារាសម្ដែង នឹងធ្វើអោយតារាស្រីរូបនេះប្រឈមធ្លាក់កូដ ពេជ្រ សោភា បានអះអាងថាខ្លួនសុខចិត្តប្រឈម។
ក្នុងនោះនាងក៏ប្រកាសនឹងបើកចំហពីរឿងឯកជនដោយមិនមានគោលការណ៍លាក់លៀមដូចគ្នានឹងតារាមួយចំនួននោះដែរ បើទោះជាលទ្ធផលនៃការបើកកកាយនឹងមានលទ្ធផលបែបណា។
ពេជ្រ សោភា និយាយថាគឺជារឿងកម្រដែលតារាសិល្បៈសុខចិត្តបើកទម្លាយរឿងរ៉ាវស្នេហា ក្នុងពេលទីផ្សារសិល្បៈរបស់ខ្លួនមានការប្រកួតប្រជែងខ្ពស់។ នាងថាមានការមើលឃើញជាច្រើនរួចមកហើយថា តារាសិល្បៈអោយតែបើកកកាយពីរឿងស្នេហា រមែងប៉ះពាល់ប្រជាប្រិយភាព ដោយបាត់បង់ការគាំទ្រ ដែលជាហេតុបណ្ដាលអោយតារាទាំងនោះសុខចិត្តលាក់បាំង។
ក្នុងនោះសូម្បីតែរឿងឯកជនត្រូវបានទម្លាយទៅហើយ ក៏កម្រនោះដែរដែលពួកគេទទួលស្គាល់។
នាងនិយាយថា៖ «មិនមែនតារាយើងមិនចង់និយាយទេ តែឃើញមកហើយគឺអោយតែបើកកាយ(រឿងផ្ទាល់ខ្លួន) ច្រើនតែធ្លាក់កូដ ត្រង់ហ្នឹងហើយដែលតារាយើងមិនច្រើនក្លាហានទទួលស្គាល់!»។
យ៉ាងណាមិញ នាងថាសម្រាប់រូបនាងមិនខ្លាចចំពោះការពិតនោះទេ ដោយនាងយល់ថាការប្រឹងបិទបាំង គឺជារឿងមួយអាម៉ាសខ្លាំងនៅពេលរឿងរ៉ាវត្រូវបានទម្លាយនោះផង។ នាងថាតារាមួយចំនួនយល់ថារឿងរ៉ាវឯកជន គឺជារឿងអាថ៌កំបាំង និងមិនគួរទម្លាយឬទទួលស្គាល់ ប៉ុន្តែសម្រាប់រូបនាងមិនយល់បែបហ្នឹងនោះទេ ទើបនាងរមែងទទួលស្គាល់ជាហូរហែដោយមិនប្រើយុទ្ធសាស្រ្តបង្វែងដាន។
នាងនិយាយថាតាំងពីចូលសិល្បៈ នាងមិនចូលចិត្តប្រកែកនៅពេលការពិតត្រូវបានបែកធ្លាយនោះទេ ដោយសូម្បីតែរឿងភ្ជាប់ពាក្យ ឬបែកគ្នាវិញជាមួយអាណិកជនទី១នៅអាមេរិក ក៏នាងទទួលស្គាល់ ហើយរឿងលែងប្ដីចុងក្រោយដែលមហាជនភាគច្រើនយល់ថានាងនឹងបិទបាំងដូចគ្នាតារាមួយចំនួន ក៏នាងបើកទូលាយ។
នាងនិយាយថា៖ «សម្រាប់ខ្ញុំបើគេមិនសួរ នោះមិនដឹងថាប្រាប់អីមែន តែបើគេដឹងទៅហើយនៅលាក់គេអីទៀត និយាយទៅបើគ្រាន់តែសារភាពឬទទួលការពិតហើយធ្លាក់កូដតាមដំណើរ អត់ខ្វល់!»។
ពេជ្រ សោភា បន្តថាដោយសារតែនាងជាតារាដែលមានទម្លាប់មិនបិទបាំងអាថ៌កំបាំងផ្ទាល់ខ្លួននោះហើយ ទើបនាងសម្រេចចិត្តបើកកកាយរឿងរ៉ាវឯកជនមួយថ្មី ពាក់ព័ន្ធនឹងការបង្កើតស្នេហាជាមួយតារាសម្ដែង ឆឹម សក្កដា ដែលផ្ទុយពីតារាមួយចំនួនប្រឹងប្រកែក។
បើទោះជានាងនៅតែប្រើពាក្យថាមិត្តភ័ក្ត្រសំដៅទៅលើតារាសម្ដែងលោក ឆឹម សក្កដា ជាមិត្តល្អ ប៉ុន្តែទង្វើនិងការទទួលសា្គល់គឺនាងបានសារភាពថាបុរសម្នាក់នោះមានចំណែកសំខាន់ក្នុងជីវិត។
នាងថាលោក ឆឹម សក្កដា មិនខ្លាចធ្លាក់កូដព្រោះតែការលាតត្រដាងស្នេហានោះទេ ជាពិសេសនៅពេលបុរសដែលនាងចាប់អារម្មណ៍មានភាពក្លាហានគ្រប់គ្រាន់។
នាងថាជារឿងគួរសរសើរដែលលោក សក្កដា ប្រកាសថានាងជាគូស្នេហ៍ ដោយមិនខ្លាចប៉ះពាល់ចំពោះការប្រឈមលើប្រជាប្រិយ។ ត្រង់ចំណុចហ្នឹងហើយដែលនាងពេញចិត្តទទួលស្គាល់ការពិតដូចគ្នា ដើម្បីអោយផ្លូវចិត្តរបស់នាងសប្បាយចិត្ត។
យ៉ាងណាមិញនាងថា រវាងនាងនិងលោក ឆឹម សក្កដា មិនទាន់ស៊ីជម្រៅដូជគ្នានឹងគូស្នេហ៍បេះមិនដាច់នៅឡើយទេ បើទោះជានាងទទួលស្គាល់រវាងនាងនិងលោកគឺលើសពីមិត្តធម្មតា។ នាងថាសុខចិត្តធ្លាក់កូដ បើគ្រាន់តែនាងទទួលស្គាល់ស្នេហាជាមួយបុរសម្នាក់ ហើយត្រូវមហាជនរិះគន់ រហូតថមថយនូវការគាំទ្រ។
នាងនិយាយថា៖ «ខ្ញុំគិតខុសពីគេ បើតារាម្នាក់នោះ គាត់មានសមត្ថភាព គឺបញ្ហាគាត់មានស្នេហា ឬបែកបាក់ស្នេហ៍អីវាមិនអាចដល់ថ្នាក់ធ្លាក់កូដទេ ចឹងហើយបានខ្ញុំនៅយល់ថាខ្ញុំអត់គួរខ្លាចគ្រាន់តែរឿងហ្នឹងទេ គឺខ្ញុំពេញចិត្តទទួលយក»។
នាងថាលោក ឆឹម សក្កដា គឺជាបុរសដែលនាងត្រូវចិត្ត ហើយនាងក៏មិនខ្លាចប្រកាសជាសាធារណៈពីទំនាក់ទំនងល្អប្រសើរជាមួយគ្នានោះទេ បើទោះជានាងថាសុំអោយប្រើពាក្យថាមិត្តល្អ ឬជាមិត្តភ័ក្ត្រសំដៅទៅលើទំនាក់ទំនងជាមួយលោក សក្កដា។
ជាមួយនឹងការប្រកាសនេះគឺយល់ថា ពេជ្រ សោភា ជាតារាមានចិត្តក្លាហាន។ អ្វីដែលគេកត់សម្គាល់គឺរឿងឯកកជនដែលបានទម្លាយចេញ មិនបានធ្វើអោយតារាស្រីរូបនេះប៉ះពាល់ទីផ្សារនោះទេ ជាពិសេសបន្ទាប់ពីនាងផ្ទុះខ្លាំងជាមួយនឹងបទល្អក្រោយចាប់ដៃគូជាមួយ លោក ងួន ច័ន្ទដាវីត ជាដៃគូចម្រៀង។
ពេជ្រ សោភា បញ្ជាក់ថាសប្បាយចិត្តដែលបទដែលប្រឹងផលិតត្រូវបានទទួលស្គាល់បណ្ដាក់គ្នា ដូចជាបទ «អូនទៅហើយ» និងបទ «ហុយ!ហុយ!» នាពេលចុងក្រោយ។
នាងថាបើតារាម្នាក់ៗមានសមត្ថភាពគ្រប់គ្រាន់ នោះមិនគួរនឹងខ្លាចចំពោះការទម្លាយចេញរឿងឯកជនឡើយ៕