អាជ្ញាធរកម្ពុជា បានឃាត់ខ្លួនជនជាតិវៀតណាមជាច្រើននាក់ នៅរាជធានីភ្នំពេញ បន្ទាប់ពីរកឃើញថា ពួកគេចូលមកស្នាក់នៅ និងធ្វើការខុសច្បាប់នៅក្នុងប្រទេសកម្ពុជា។
វេបសាយអគ្គស្នងនគរបាលការជាតិ ឲ្យដឹងនៅថ្ងៃនេះថា កម្លាំងសមត្ថកិច្ចមូលដ្ឋាន និងនាយកដ្ឋានអន្ដោប្រវេសន៍ បានចុះត្រួតពិនិត្យ និងឃាត់ខ្លួនជនជាតិវៀតណាមចំនួន ២២នាក់ ក្នុងនោះមានស្រី ៧នាក់ នៅទីតាំងសិប្បកម្មឈើ និងសិប្បកម្មផលិតកៅអីដែក ស្ថិតក្នុងសង្កាត់ព្រែកប្រា ខណ្ឌច្បារអំពៅ។
បើតាមការចុះផ្សាយរបស់អគ្គស្នងនគរបាលការជាតិ អាជ្ញាធរបានឃាត់ខ្លួន និងបញ្ជូនពួកគេទៅអគ្គនាយកដ្ឋានអន្តោប្រវេសន៍ ដើម្បីអនុវត្តតាមនីតិវិធី។
បើតាមមន្ដ្រីអន្តោប្រវេសន៍ ជនបរទេសរស់នៅកម្ពុជាមានប្រមណជាង ១៦ម៉ឺននាក់ ក្នុងនោះជនជាតិវៀតណាមមានច្រើនជាងគេដល់ទៅជាង ៩៩ភាគរយ ខណៈដែលជនជាតិវៀតណាមកាន់កាប់ឯកសារខុសប្រក្រតី មានចំនួនជាង ៧ម៉ឺន ៦ពាន់នាក់ (៧៦ ៣៩៨នាក់) ហើយជនជាតិវៀតណាមជាង ១ ម៉ឺន៤ពាន់នាក់ទៀត (១៤ ២៤៦នាក់) កំពុងរស់នៅដោយគ្មានឯកសារស្របច្បាប់។
ក្រោយមានបញ្ជាផ្ទាល់មាត់ពីរដ្ឋមន្ដ្រីក្រសួងមហាផ្ទៃ លោក ស ខេង នោះ អគ្គនាយកនៃអគ្គនាយកដ្ឋានអន្តោប្រវេសន៍ លោក សុខ ផល បានឲ្យដឹងកាលពីថ្ងៃទី៩មករាថា ចាប់ពីខែវិច្ឆិកាឆ្នាំមុនដល់ដើមខែមករាឆ្នាំ២០១៨ អាជ្ញាធរបានដកហូតឯកសារខុសប្រក្រតីចំនួន ១៥ភាគរយ ហើយភាគច្រើនជាជនអន្តោប្រវេសន៍វៀតណាម៕
