នគរបាលមីយ៉ាន់ម៉ាបានថ្លែងថា ពួកគេបានបើកការបាញ់ប្រហារ ទៅលើហ្វូងអ្នកតវ៉ាជាជនជាតិភាគតិចកាន់សាសនាព្រះពុទ្ធនៅក្នុងរដ្ឋរ៉ាឃីនពេលដែលអ្នកទាំងនោះព្យាយាមតវ៉ាឡោមព័ទ្ធការិយាល័យរដ្ឋាភិបាលកាលពីថ្ងៃអង្គារ។
របាយការណ៍សមត្ថកិច្ចបានបង្ហាញ ក្នុងហេតុការបង្ក្រាបដោយបាញ់កាំភ្លើងប្រើប្រាស់គ្រាប់ពិតនេះ បានបណ្តាលឲ្យជនជាតិភាគតិចចំនួន៧នាក់បានស្លាប់ និង ជាច្រើននាក់ផ្សេងទៀតរងរបួសត្រូវបញ្ជូនទៅសង្គ្រោះនៅមន្ត្រីពេទ្យ។ នេះបើតាមទីភ្នាក់ងារព័ត៌មាន AFP។
ហេតុការណ៍បានកើតឡើងនៅពេលដែលជនជាតិភាគតិចកាន់សាសនាព្រះពុទ្ធប្រមាណ៥០០០នាក់ប្រមូលផ្តុំក្នុងពិធីអ្នកជាតិនិយម នៅក្នុងទីក្រុង Mrauk U ជាទីក្រុងនៅភាគខាងជើងនៅក្នុងរដ្ឋរ៉ាឃីន ហើយក៏ជារដ្ឋដែលមានការបង្ក្រាបខ្លាំងក្លាពីសំណាក់យោធាលើជនជាតិភាគតិច។
ទោះយ៉ាងណា គេមិនទាន់បានដឹងមូលហេតុច្បាស់លាស់ថា តើហេតុអ្វីនាំឲ្យមានការប្រមូលផ្តុំជាទ្រង់ទ្រាយធំ ហើយឈានដល់ការបង្ក្រាបនេះទេ។
ប៉ុន្តែគេដឹងថា ជនជាតិភាគតិចជាច្រើននៅក្នុងរដ្ឋរ៉ាឃីនគឺជាក្រុមជនក្រីក្រ រងផលប៉ះពាល់ និង ការគៀបសង្កត់ច្រើន។ ការប៉ះទង្គិចនេះកើតឡើងស្របពេលដែលរដ្ឋាភិបាលមីយ៉ាន់ម៉ាចាប់ផ្តើមសហការជាមួយបង់ក្លាដេសក្នុងការបញ្ជូនជនជាតិភាគតិចរ៉ូហ៊ីងយ៉ាចូលក្នុងប្រទេសមីយ៉ាន់ម៉ាវិញ៕