តំណាងស្ថានទូតអាមេរិកប្រចាំកម្ពុជា បដិសេធចំពោះការចោទប្រកាន់ពីប្រមុខរដ្ឋាភិបាលកម្ពុជា ដែលលើកឡើងថា លោកសង្ស័យចារកម្មអាមេរិកអាចជាអ្នកនៅពីក្រោយការស្លាប់អ្នកវិភាគនយោបាយល្បីឈ្មោះលោកបណ្ឌិត កែម ឡី។
ក្នុងពិធីជួបជាមួយក្រុមអ្នកគាំទ្រនៅប្រទេសអូស្ដ្រាលីកាលពីថ្ងៃសុក្រកន្លងមកនេះ លោកនាយករដ្ឋមន្ដ្រី ហ៊ុន សែន បានផ្ដាំទៅភរិយាលោក កែម ឡី គឺអ្នកស្រី ប៊ូ រចនា កុំឲ្យចាត់ទុករូបលោកជាសត្រូវ ខណៈលោកសង្ស័យថា អ្នកនៅពីក្រោយការស្លាប់របស់លោក កែម ឡី អាចជាចារកម្មរបស់អាមេរិក។
លោកថ្លែងទៀតថា ក្នុងនោះ លោក ជុន ចាន់បុត្រ ក៏ធ្លាប់និយាយអំពីរឿងនេះ នៅពេលអនុប្រធានវិទ្យុអាស៊ីសេរីរូបនេះ បានទៅជួបមេបញ្ជាការកងទ័ព និងកូនប្រុសលោក ដើម្បីសុំជួយការពារសុវត្ថិភាព ដោយថា ខ្លាចអាមេរិកសម្លាប់ដូច លោក កែម ឡី។
ឆ្លើយនឹងសំណួរអ្នកសារព័ត៌មានក្នុងពិធីមួយនៅខេត្តកំពង់ធំនៅថ្ងៃនេះ ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក William Heidt មានប្រសាសន៍ថា លោកមានសោកស្ដាយ និងហួសចិត្ត ចំពោះការចោទប្រកាន់បែបនេះពីសំណាក់លោកនាយករដ្ឋមន្ដ្រី ហ៊ុន សែន និងចាត់ទុកថា នេះជាការវាយប្រហារមកលើរដ្ឋាភិបាលសហរដ្ឋអាមេរិក។
លោកអះអាងថា អាមេរិកជាប្រទេសប្រកាន់លទ្ធិប្រជាធិបតេយ្យ គោរពសិទ្ធិមនុស្ស និងគាំទ្រអង្គការសង្គមស៊ីវិល និងថា ករណីឃាតកម្មលោក កែម ឡី កាលពីជិត ២ឆ្នាំមុន ចាំបាច់ត្រូវមានការស៊ើបអង្កេតដោយបើកជំហរ និងមានតម្លាភាព។
លោកក៏ច្រានចោលការចោទថា លោក ជុន ចាន់បុត្រ គឺជាចារកម្មអាមេរិក និងថា ការថ្លែងរបស់លោក ហ៊ុន សែន គឺជាការចោទប្រកាន់ដ៏ឆ្គួតលីលា។
លោកថ្លែងថា៖ «ខ្ញុំចង់និយាយបន្ដិចទេ អំពីការអត្ថាធិប្បាយមួយចំនួនពីប្រទេសអូស្ដ្រាលី កាលពីចុងសប្ដាហ៍នេះ។ ពិតណាស់ ការថ្លែងមួយកាលពីថ្ងៃសុក្រ អំពីសហរដ្ឋអាមេរិក និងព្រឹត្តិការណ៍ដ៏សោកសៅអំពីលោក កែម ឡី ពិតណាស់ ការថ្លែងទាំងពីរនេះ គឺមិនច្បាស់លាស់ និងជាការវាយប្រហារមកលើអាមេរិក។ អ្នកទាំងអស់គ្នានៅកម្ពុជា សុទ្ធតែដឹងថា យើងបានគាំទ្រយ៉ាងពេញទំហឹងផ្នែកប្រជាធិបតេយ្យ យើងគាំទ្រដល់អង្គការសង្គមស៊ីវិល។ យើងធ្លាប់បាននិយាយតាំងដើមមក នៅពេលលោក កែម ឡី ត្រូវបានគេសម្លាប់ យើងបាននិយាយអំពីសារសំខាន់នៃការបើកការស៊ើបអង្កេតបើកជំហរ និងតម្លាភាព»។
អ្នកវិភាគបញ្ហានយោបាយលោក កែម ឡី ត្រូវបានខ្មាន់កាំភ្លើងបាញ់សម្លាប់ទាំងកណ្ដាលថ្ងៃត្រង់នៅស្ដារម៉ាតមួយកន្លែង ក្នុងរាជធានីភ្នំពេញ កាលពីខែកក្កដាឆ្នាំ២០១៦។
អាជ្ញាធរកម្ពុជា បានចាប់ខ្លួនបុរសម្នាក់ប៉ុណ្ណោះ ឈ្មោះ អឿត អាង ហៅខ្លួនឯងថា ជួប សម្លាប់ ដែលត្រូវបានតុលាការផ្ដន្ទាទោសដាក់គុកមួយជីវិត។
យ៉ាងនេះក្ដី សាច់ញាតិ និងភិរិយាលោក កែម ឡី មិនជឿថា បុរសឈ្មោះ ជួប សម្លាប់ គឺជាឃាតករពិតប្រាកដក្នុងករណីឃាតកម្មនេះទេ។
របាយការណ៍ស៊ើបអង្កេតរបស់សារព័ត៌មាន Al Jazeera ចេញផ្សាយកាលពីខែមករាឆ្នាំ២០១៧ បានបង្ហាញថា ប្រភព និងសាក្សីជាច្រើនក្នុងខេត្តសៀមរាប បានរៀបរាប់ឲ្យដឹងថា បុរសឈ្មោះ «អឿត អាង» ត្រូវបានគេហៅទៅជួបប្រជុំជាមួយមន្ដ្រីថ្នាក់ស្រុក និងមន្ដ្រីយោធាជាន់ខ្ពស់មួយចំនួន ពោលគឺប្រហែលមួយសប្ដាហ៍ មុនកើតឃាតកម្មលើលោក កែម ឡី៕
រាយការណ៍បន្ថែមដោយ កញ្ញា ខាន់ លក្ខិណា
