មន្ត្រីជាន់ខ្ពស់របស់រដ្ឋអំណាចចិនមួយរូបបានថ្លែងថា លោកស្តាប់រាល់ការទាមទាររបស់អ្នកនយោបាយនៅហុងកុង ក្នុងដំណើរការនៃការសម្របសម្រួល ខណៈពលរដ្ឋនៅហុងកុងកំពុងធ្វើសកម្មភាពប្រឆាំងការគាបសង្កត់របស់រដ្ឋអំណាចទីក្រុងប៉េកាំង។
ក្នុងដំណើរទស្សនកិច្ច៣ថ្ងៃរបស់លោក Zhang Dejiang ប្រធានគ្រប់គ្រងផ្នែកនីតិបញ្ញត្តិនៃគណបក្សកុម្មុនីស្តចិនបានចាប់ផ្តើមនៅលើទឹកដីហុងកុងកាលពីថ្ងៃអង្គារម្សិលមិញ។ នេះបើតាមសារព័ត៌មានChannel News Asia។
លោកបានទៅដល់ព្រលានយន្តហោះនៅហុងកុងកាលពីរសៀលម្សិលមិញ ហើយបានជួបជាមួយមេដឹកនាំហុងកុងលោក Leung Chun-ying។ នៅក្នុងសុន្ទរកថាខ្លីមួយរបស់លោកនៅលើផ្លូវថ្នល់ដោយបញ្ជាក់ថា លោកស្តាប់និងពិនិត្យលើទិដ្ឋភាពនយោបាយ ស្តាប់រាល់ការលើកឡើងពីដំណើរជីវិត ការស្នើឡើង និងការទាមទារអ្វីមួយ ហើយនឹងគោរពអនុវត្តទីតាមគោលនយោបាយប្រទេសមួយប្រព័ន្ធដឹកនាំពីរ។ លោក Zhang ចង់សំដៅទៅលើប្រព័ន្ធពាក់កណ្តាលស្វយ័តលើការគ្រប់គ្រងដែនដីហុងកុងតាំងពីរអង់គ្លេសប្រគល់ដែនដីនេះឲ្យចិនគ្រប់គ្រងវិញកាលពីឆ្នាំ១៩៩៧។
ការធ្វើដំណើរទស្សនកិច្ចរបស់លោក Zhang ទៅហុងកុងនេះ ដើម្បីសម្រុះសម្រួលបញ្ហាខណៈប្រជាពលរដ្ឋហុងកុងកំពុងខឹងសម្បារចំពោះរដ្ឋអំណាចទីក្រុងប៉េកាំងគាបសង្កត់លើពួកគេ ហើយចលនាទាមទារយកឯករាជ្យកំពុងស្ទុះឡើងខ្លាំងក្លា។
លោក Zhang Dejiang ធ្វើដំណើរទៅកាន់ទឹកដីហុងកុងនេះប្រឈមនឹងការតវ៉ាប្រឆាំងរូបលោកច្រើនពីសំណាក់ប្រជាពលរដ្ឋនៅទីនោះ។ សមត្ថកិច្ចនិងរបាំងជាច្រើនត្រូវបានដាក់ពង្រាយនៅតាមគោលដៅដែលមន្ត្រីជាន់ខ្ពស់របស់ចិនរូបនេះទៅបំពេញទស្សនកិច្ច។
សមាជិកនាក់គណបក្សដែលគាំទ្រលទ្ធិប្រជាធិបតេយ្យគឺគណបក្សសម្ព័ន្ធដើម្បីលទ្ធិប្រជាធិបតេយ្យសង្គមត្រូវបានចាប់ខ្លួនកាលពីព្រឹកម្សិលមិញ បន្ទាប់ពីពួកគេលើកបដាតវ៉ាប្រឆាំងលោក Zhang Dejiang៕