ក្រសួងការពារជាតិវៀតណាម បានឲ្យដឹងថា ចិនបានបញ្ជូននាវាកាលពីថ្ងៃសុក្រកន្លងមក ឆ្លើយតបទៅនឹងសំណើពីវៀតណាម ឲ្យជួយស្វែងរកយន្តហោះមួយគ្រឿង ដែលបានធ្លាក់ជាមួយបុគ្គលិក ៩នាក់ ខណៈប្រទេសនេះកំពុងស្វែងរកយន្តហោះចម្បាំងមួយគ្រឿងដែលកំពុងបាត់ខ្លួន។
ទីភ្នាក់ងារព័ត៌មាន បានដកស្រង់ខ្លឹមសារនៃសេចក្ដីប្រកាសព័ត៌មានមួយរបស់ក្រសួងការពារជាតិវៀតណាម ហើយរាយការណ៍ថា យន្តហោះល្បាតឆ្នេរសមុទ្រ CASA បានធ្លាក់កាលពីថ្ងៃព្រហស្បតិ៍កន្លងមក នៅឈូងសមុទ្រតុងកឹង នៅចន្លោះឆ្នេរសមុទ្រវៀតណាម និងកោះហៃណានរបស់ចិន ជាទីដែលក្រុមសង្គ្រោះបានរកឃើញបំណែក និងសម្ភារៈមួយចំនួន។
យន្តហោះដែលផលិតដោយក្រុមហ៊ុន Airbus នោះ ត្រូវបានគេបញ្ជូនឲ្យទៅស្វែងរកយន្តហោះចម្បាំង Sukhoi SU-30 ដែលបានបាត់ខ្លួនពីរ៉ាដាកាលពីថ្ងៃអង្គារកន្លងមកនេះ។ អាកាសយានិកម្នាក់ក្នុងចំណោម ២នាក់ ត្រូវគេជួយសង្គ្រោះបានពីសមុទ្រមួយថ្ងៃក្រោយមក។
កម្លាំងល្បាតឆ្នេរសមុទ្រ កងទ័ពជើងទឹក កងទ័ពជើងអាកាស និងក្រុមនេសាទជាច្រើនពាន់នាក់ កំពុងស្វែងរកយន្តហោះទាំងពីរគ្រឿងនោះ។
ចំណែកឯប្រទេសចិន បានបញ្ជូននាវាល្បាតឆ្នេរសមុទ្រពីរគ្រឿង ទៅជួយស្វែងរកយន្តហោះ CASA ដែលជាការឆ្លើយតបទៅនឹងសំណើរបស់វៀតណាម និងបានអនុញ្ញាតឲ្យនាវារបស់ខ្លួនចូលទៅក្នុងដែនទឹកមួយ ដែលប្រទេសទាំងពីរឯកភាព។
យន្តហោះល្បាតនោះ បានធ្លាក់នៅអំឡុងពេលមានអាកាសធាតុអាក្រក់។
វៀតណាម បានជួបប្រទះនឹងឧបទ្ទវហេតុធ្លាក់យន្តហោះជាបន្តបន្ទាប់នៅក្នុងរយៈពេល ២ឆ្នាំកន្លងមកនេះ ដោយសារតែឧទ្ធម្ភាគចក្រចាស់របស់ខ្លួន ប៉ុន្តែ ករណីធ្លាក់យន្តហោះ គឺជាកម្រកើតមាន៕