អ្នករាយការណ៍ពិសេសផ្នែកសិទ្ធិមនុស្សរបស់អង្គការសហប្រជាជាតិ បានវាយតម្លៃស្ថានភាពទូទៅរបស់កម្ពុជាថា មានភាពតានតឹង និងហាក់កំពុងខិតទៅជិតស្ថានភាពគ្រោះថ្នាក់ ខណៈបញ្ហានេះនឹងទំនងបង្កើតបរិយាកាសមួយ ដែលអាចប៉ះពាល់ដល់ការបោះឆ្នោតឆ្នាំក្រោយ។
ក្នុងសន្និសីទព័ត៌មាន បិទបញ្ចប់បេសកម្មនៅរសៀលថ្ងៃទី១៨សីហានេះ អ្នករាយការណ៍ពិសេសស្តីពីសិទ្ធិមនុស្សនៅកម្ពុជា លោកស្រី រ៉ូណា ស្មីត បានកត់សំគាល់ជាទូទៅថា កម្ពុជាហាក់កំពុងខិតជិតស្ថានភាពគ្រោះថា្នក់ ដែលក្នុងនោះ លោកស្រី ក៏បានលើកឡើងពីចំណាត់ការផ្លូវច្បាប់ជាច្រើនប្រឆាំងនឹងអ្នកនយោបាយ ការចោទប្រកាន់អង្គការសង្គមស៊ីវិលពីសំណាក់រដ្ឋាភិបាល ការឃុំខ្លួនបណ្តោះអាសន្ន ការបំភិតបំភ័យ និងការភ័យខ្លាច ដើរមិនស្របគ្នាជាមួយនឹងបរិយាកាសមួយ ដែលនាំឲ្យមានការបោះឆ្នោតដោយសេរីនោះទេ។
លោកស្រីមានប្រសាសន៍បន្ថែមថា៖ «បើទោះបីជាមានភាពជោគជ័យនៃការបោះឆ្នោតឃុំសង្កាត់ ក៏ខ្ញុំនៅតែមានកង្វល់អំពីវោហាសាស្ត្របែបហិង្សា ដែលសម្តែងឡើងដោយសមាជិករដ្ឋាភិបាល និងយោធា។ មតិយោបល់បែបនេះ មិនគួរត្រូវបានធ្វើឡើងដោយរដ្ឋមន្ត្រីនៃរដ្ឋាភិបាលឡើយ សូម្បីតែនៅក្នុងភាពឯកជនក៏ដោយ។…ខ្ញុំបានកត់សម្គាល់នូវវិសោធនកម្មជាច្រើនលើច្បាប់ស្តីពីគណបក្សនយោបាយ ជាពិសេសលើការសើរើឡើងវិញ ដែលហាមឃាត់គណបក្សមួយមិនឲ្យប្រើរូបភាពសំឡេង ឬឯកសារជាលាយលក្ខណ៍អក្សរ ឬសកម្មភាពនានានៃជនដែលត្រូវបានកាត់ទោសពីបទឧក្រិដ្ឋ ឬបទមជ្ឈឹម » ។
លោកស្រី រ៉ូណា ស្មីត ក៏ជម្រុញរាជរដ្ឋាភិបាលកម្ពុជាឲ្យធានាថា គ្រប់ភាគីទាំងអស់មានលទ្ធភាពក្នុងការសួរដេញដោយគ្នានិងការពិភាក្សាគ្នា ដោយចំហលើបញ្ហា ដែលជាកង្វល់របស់ប្រជាជនកម្ពុជាទាំងអស់។
អ្នកនាំពាក្យគណបក្សប្រជាជនកម្ពុជាលោក សួស យ៉ារ៉ា ហៅការវាយតម្លៃរបស់លោកស្រី ស្មីត នេះថាមិនបានវាយតម្លៃត្រឹមត្រូវគ្រប់ជ្រុង នៃទិដ្ឋភាពសង្គមកម្ពុជានោះទេ។
លោកថា៖ «ខ្ញុំយល់ថា លោកស្រី រ៉ូណា ស្មីត គាត់គ្រាន់តែធ្វើទស្សនៈកិច្ចមួយពេលៗ គាត់មិនអាចយល់អស់ពីអ្វីនៅក្នុងសង្គមយើងនោះទេ។ អញ្ចឹង គាត់មិនបានដឹងថា អ្វីដែលជាការរីកចំរើន អ្វីដែលជាសេរីភាព ឲ្យពេញលេញរបស់ប្រជាជនកម្ពុជាយើង ដែលពីមុនហ្នឹងឥឡូវវាខុសគ្នាដូចម្តេច។ អញ្ចឹងអ្វីដែលគាត់លើកឡើង ជាករណីរបស់បុគ្គលមួយៗ តែបើរាយការណ៍ជាសង្គមទាំងមូលខ្ញុំយល់ថាវាមិនទាន់ពេញលេញទេ»។
បើតាមលោកស្រី ស្មីត របាយការណ៍ពីបេសកកម្មនេះ នឹងត្រូវលោកស្រីរាយការណ៍ដោយផ្ទាល់មាត់ ក្នុងសន្និបាតក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ នៅចុងខែកញ្ញាខាងមុខនេះផងដែរ៕