ក្រុមតំណាងរាស្ត្រគណបក្សសង្គ្រោះជាតិ បានបន្តថ្លែងសារនៅមុខពន្ធនាគារត្រព្រាំងផ្លុង ក្នុងខេត្តត្បូងឃ្មុំ ថ្វីបើសំណើសុំជួបប្រធានបក្សរបស់ខ្លួន ត្រូវបានតុលាការបដិសេធជាលើកទី២។
នៅព្រឹកថ្ងៃទី១៨កញ្ញានេះ ក្រុមតំណាងរាស្ត្របក្សប្រឆាំង ចំនួន១២នាក់ តំណាងដោយលោក ម៉ៅ មុនីវណ្ណ បានបន្តចុះទៅពន្ធនាគារត្រពាំងផ្លុង ក្នុងស្រុកពញ្ញាក្រែក ខេត្តត្បូងឃ្មុំ ដើម្បីថ្លែងសារនយោបាយនានា ខណៈសំណើសុំជួបលោក កឹម សុខា ត្រូវបានតុលាការបដិសេធ ជាលើកទី២ ដោយថា សំណុំរឿងកំពុងស្ថិតក្នុងចំណាត់ការស៊ើបសួរ។
ថ្លែងនៅមុខពន្ធនាគារ អ្នកតំណាងរាស្ត្រមណ្ឌលកំពង់ចាម លោក ម៉ៅ មុនីវណ្ណ បានបញ្ជាក់ថា ការជួបជុំនៅមុខពន្ធនាគារ ថ្ងៃនេះ គឺដើម្បីសម្តែងការមិនពេញចិត្ត នឹងចំណាត់ការររបស់អាជ្ញាធរ និងទាមទារឲ្យមានការដោះលែងលោក កឹម សុខា ឲ្យមានសេរីភាពវិញ។
លោកថា៖ «ក្រុមអ្នកតំណាងរាស្ត្រគណបក្សសង្គ្រោះជាតិ ស្វាគមន៍សេចក្តីសម្រេច របស់សហគមន៍អន្តរជាតិ ដែលមានជាបន្តបន្ទាប់ គឺយើងស្វាគមន៍ ហើយយើងត្រៀមខ្លួនជានិច្ច ក្នុងការជម្រុញធ្វើឲ្យ ព្រះរាជាណាចក្រកម្ពុជារបស់យើងហ្នឹង គោរពតាមរដ្ឋធម្មនុញ្ញ ហើយបរិយាកាសបោះឆ្នោតមានភាពសេរីត្រឹមត្រូវ និងយុត្តិធម៌ ដែលអាចទទួលបាន ទាំងអស់គ្នា»។
ប្រធានគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចចាប់ខ្លួន កាលពីដើមខែកញ្ញា និង ត្រូវបានតុលាការចោទប្រកាន់ថា «ក្បត់ជាតិ» និងបានឃុំខ្លួនបណ្តោះអាសន្ន នៅពន្ធនាគារត្រពាំងផ្លុង ខេត្តត្បូងឃ្មុំ ជាប់ព្រំដែនវៀតណាម។
កាលពីថ្ងៃទី០៦ខែកញ្ញា ក្រុមតំណាងរាស្ត្រគណបក្សសង្គ្រោះជាតិ បានដាក់លិខិតស្នើសុំជួបលោក កឹម សុខា ម្តងរួចហើយ ប៉ុន្តែត្រូវបានសាលាដំបូងរាជធានីភ្នំពេញ បដិសេធក្រោមហេតុផលដដែល។
លើកទី២នេះ ក៏ដូចជាលើកមុនផងដែរ ក្នុងដំណើរទៅសួរសុខទុក្ខលោក កឹម សុខា នៅពន្ធនាគារត្រពាំងផ្លុង គេសង្កេតឃើញមាន កងកម្លាំងអាជ្ញាធរចម្រុះ រាប់សិបនាក់ ប្រដាប់ដោយអាវុធ ត្រូវបានដាក់ពង្រាយនៅជុំវិញពន្ធនាគារ៕
