រដ្ឋបាលប្រធានាធិបតីអាមេរិក លោក ដូណាល់ ត្រាំ បានពង្រឹងការដាក់សម្ពាធទៅលើកូរ៉េខាងជើង នៅថ្ងៃនេះ មួយសប្ដាហ៍មុននឹងការជជែកយ៉ាងតឹងតែងនៅឯអង្គការសហប្រជាជាតិ ដោយព្រមានកម្ទេចក្រុងព្យុងយ៉ាង ប្រសិនបើរដ្ឋឯកោមួយនេះ នៅតែមិនព្រមបញ្ឈប់កម្មវិធីនុយក្លេអ៊ែរ និងគ្រាប់មីស៊ីលរបស់ខ្លួននោះ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
ខណៈដែលក្រុមមន្ត្រីអាមេរិក និងពួកសម្ព័ន្ធមិត្តកំពុងតែព្យាយាមស្វែងរកដំណោះស្រាយដើម្បីទប់ស្កាត់ក្រុងព្យុងយ៉ាងនោះ ប្រធានាធិបតីអាមេរិក នឹងឡើងថ្លែងនៅមហាសន្និបាតអង្គការសហប្រជាជាតិ នៅថ្ងៃស្អែកនេះ ហើយបន្ទាប់មក នឹងជួបជជែកជាមួយសមភាគីជប៉ុន និងកូរ៉េខាងត្បូង នៅក្រៅកិច្ចប្រជុំអង្គការសហប្រជាជាតិ នៅថ្ងៃព្រហស្បតិ៍ខាងមុខ។
ដោយផ្អែកតាមខុទ្ទកាល័យវិមានបៃតងក្រុងសេអ៊ូល AFP បានផ្សាយបន្តថា លោក ត្រាំ និងប្រធានាធិបតីកូរ៉េខាងត្បូង លោក មូន ជែអ៊ីន បានជជែកគ្នាតាមទូរស័ព្ទកាលពីយប់ថ្ងៃសៅរ៍សប្ដាហ៍មុន ហើយបានប្ដេជ្ញាដាក់«សម្ពាធខ្លាំងថែមទៀត» ទៅលើរបបលោក គីម ជុងអ៊ុន។ វិមានបៃតង បានបន្ថែមថា គេត្រូវតែធ្វើឲ្យកូរ៉េខាងជើងភ្លឺភ្នែកថា ទង្វើគឃ្លើនបន្ថែមវទៀត នឹងធ្វើឲ្យរបបនេះស្ថិតលើផ្លូវទៅរកការដួលរលំ។
ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃចន្ទសប្ដាហ៍មុន បានអនុម័តទណ្ឌកម្មថ្មីទៀតដាក់លើកូរ៉េខាងជើង ប៉ុន្តែ ប្រសិទ្ធភាពនៃទណ្ឌកម្មថ្មីនេះ វាអាស្រ័យយ៉ាងខ្លាំងទៅលើប្រទេសចិន ដែលជាសម្ព័ន្ធមិត្ត និងជាដៃគូសេដ្ឋកិច្ចធំបំផុតរបស់ក្រុងព្យុងយ៉ាង និងប្រទេសរុស្ស៊ី ដែលបានទទួលយកពលករកូរ៉េខាងជើងប្រហែល ១ម៉ឺននាក់ ឲ្យបម្រើការនៅរុស្ស៊ីនោះ។
អគ្គរដ្ឋទូតអាមេរិកប្រចាំអង្កការសហប្រជាជាតិ អ្នកស្រី Nikki Haley បន្តដាក់សម្ពាធនៅមុនកិច្ចប្រជុំនៅទីក្រុងញូវយ៉កនាពេលខាងមុខនេះ ដោយអ្នកស្រីបញ្ជាក់ថា ប្រសិនបើកូរ៉េខាងជើងបន្តគំរាមកំហែងដល់អាមេរិក ឬសម្ព័ន្ធមិត្តរបស់អាមេរិកនោះ កូរ៉េខាងជើងនឹងត្រូវវិនាស៕
លោក ត្រាំ ក៏បានព្រមានកាលពីមុនផងដែរថា លោកនឹងបាច់ភ្លើងដាក់លើកូរ៉េខាងជើង ហើយអ្នកស្រី Nikki Haley ថា លោក ត្រាំ មិនមែនព្រមានចោលនោះឡើយ៕