ព្យុះទីហ្វុងសារិកា បានវាយបោកបក់យ៉ាងខ្លាំងក្លាទៅលើខេត្តហៃណានរបស់ចិននៅថ្ងៃនេះ ជាមួយភ្លៀងធ្លាក់ជោគជាំ និងខ្យល់បក់ល្បឿន ១៦២គីឡូម៉ែត្រក្នុងមួយម៉ោង ដោយបង្ខំឲ្យអាជ្ញាធរនៅលើកោះភាគខាងត្បូងនេះ បិទសាលារៀន និងផ្អាកសេវាដឹកជញ្ជូន។ នេះដោយយោងតាមកការផ្សាយរបស់ទីភ្នាក់ងារព័ត៌មាន Reuters។
Reuters ដែលបានដកស្រង់ព័ត៌មានពីទីភ្នាក់ងារព័ត៌មានស៊ិនហួ បានបន្តថា សេវារថភ្លើង ត្រូវបានផ្អាកកាលពីថ្ងៃម្សិលមិញ ហើយជើងហោះហើរចំនួន ២៥០ ត្រូវបានលុបចោល នៅឯព្រលានយន្តហោះអន្តរជាតិហៃគូ នៅក្នុងខេត្តនេះ។
ស៊ិនហួរ បានផ្សាយថា ការិយាល័យឧតុនិយមខេត្តនេះ ព្យាករថា មហន្តរាយកើតចេញពីព្យុះនេះ មានទំហំធំធេង ខណៈគេវាយតម្លៃថា ព្យុះនៃគឺជាព្យុះមានកម្លាំងខ្លាំងបំផុត និងបង្កមហន្តរាយធំបំផុត ដែលបោកបក់ទៅលើកោះហៃណាន ក្នុងរយៈពេល ១ទសវត្សរ៍មកនេះ។
បើតាមស៊ិនហួរ ពលរដ្ឋជាង ១៣៧០០នាក់ រស់នៅតំបន់ទំនាប ឬក្នុងផ្ទះសម្បែងមិនរឹងមាំនោះ ត្រូវបានគេជម្លៀសចេញ ខណៈសាលារៀននៅតាមស្រុកចំនួន ៨ និងទីតាំងទេសចរណ៍នានា ត្រូវបានបិទផងដែរ៕
