សកម្មជនដីធ្លីមកពីសហគមន៍មានជម្លោះដីធ្លីក្នុងរាជធានីភ្នំពេញ បានឲ្យដឹងថា ពួកគេនឹងបន្តធ្វើយុទ្ធនាការថ្ងៃចន្ទពណ៌ខ្មៅបន្តទៀត នៅព្រឹកថ្ងៃស្អែកនេះ ដើម្បីទាមទារឲ្យដោះលែងសកម្មជនការពារសិទ្ធិមនុស្ស មន្ត្រីរៀបចំការបោះឆ្នោត និងតំណាងរបស់ពួកគេ ដែលកំពុងជាប់ឃុំ។
តំណាងពលរដ្ឋសហគន៍បឹងកក់ អ្នកស្រី ប៊ូវ សោភា បានប្រាប់វីអូឌីថា សហគមន៍របស់អ្នកស្រី នឹងបញ្ឈប់យុទ្ធនាការនេះ ប្រសិនបើតុលាការសម្រេចដោះលែងតំណាងសហគមន៍បឹងកក់ អ្នកស្រី ទេព វន្នី មន្ត្រីការពារសិទ្ធិ ៤រូបរបស់សមាគមការពារសិទ្ធិមនុស្សអាដហុក និងមន្ត្រី គ.ជ.ប. លោក នី ចរិយា។
អ្នកស្រីបញ្ជាក់ថា៖ “ក្នុងសប្តាហ៍ហ្នឹង គឺពួកខ្ញុំបត់អាវខ្មៅទុក បានន័យថា ពួកខ្ញុំចង់បំបាត់យុទ្ធនាការអាវខ្មៅ នៅក្នុងសប្តាហ៍ហ្នឹងតែម្តង បើសិនជាមានការដោះលែងពួកគាត់ទាំង ៦នាក់ នៅក្នុងរយៈពេលមួយសប្តាហ៍ហ្នឹង”។
តំណាងសហគមន៍ដដែលនេះ បានបន្ថែមថា យុទ្ធនាការនៅថ្ងៃស្អែកនេះ ពួកគាត់នឹងនាំគ្នាឈរលើកបដារូបថតអ្នកជាប់ឃុំទាំងនោះ និងស្រែកទាមទារឲ្យរដ្ឋាភិបាលដោះលែងអ្នកជាប់ឃុំទាំងនោះឲ្យមានសេរីភាពឡើងវិញ។
រីឯតំណាងសហគមន៍បុរីកីឡា អ្នកស្រី ស ស៊ន បានប្រាប់វីអូឌីនៅថ្ងៃនេះថា សកម្មជនដីធ្លីនៅសហគមន៍បុរីកីឡាក៏គ្រោងនឹងធ្វើយុទ្ធនាការអាវខ្មៅនៅព្រឹកថ្ងៃទី១៩ ខែធ្នូនេះ នៅក្នុងសហគមន៍របស់ខ្លួន ដើម្បីទាមទារឲ្យដោះលែងមន្រ្តីសិទ្ធិមនុស្សអាដហុក មន្ត្រី គ.ជ.ប. និងអ្នកស្រី ទេព វន្នី ព្រមទាំងទាមទារឲ្យបញ្ចេញវីដេអូករណីឃាតកម្មលោក កែម ឡី កាលពីថ្ងៃទី១០ ខែកក្កដាកន្លងមក។
មន្ត្រីការពារសិទ្ធិមនុស្សអាដហុក ៤រូប មាន លោក នី សុខា លោក យី សុខសាន្ត លោក ណៃ វ៉ង់ដា និងលោកស្រី លឹម មុនី ត្រូវបានតុលាការរាជធានីភ្នំពេញសម្រេចឃុំខ្លួនកាលពីដើមខែឧសភាកន្លងទៅនេះ ក្រោមការចោទប្រកាន់ពីបទសូកប៉ាន់សាក្សីពាក់ព័ន្ធនឹងកញ្ញា ខុម ចាន់តារាទី ហៅស្រីមុំ ដែលត្រូវបានគេទម្លាយថា មានទំនាក់ទំនងស្នេហាដ៏ចម្រូងចម្រាស់ជាមួយមេដឹកនាំគណបក្សប្រឆាំង លោក កឹម សុខា។
រីឯអ្នកស្រី ទេព វន្នី ត្រូវអាជ្ញាធរខណ្ឌដូនពេញចាប់ខ្លួន កាលពីថ្ងៃទី១៥ ខែសីហាកន្លងមកនេះ ដោយចោទថា សកម្មជនដីធ្លីរូបនេះ បានជេរប្រមាថរាជការសាធារណៈទាក់ទិននឹងសំណុំរឿងចាស់ដែលអ្នកស្រី ទេព វន្នី ដឹកនាំការតវ៉ាប្រឆាំងនឹងការបណ្តេញចេញកាលពីឆ្នាំ២០១៣៕
