ឆេះរថយន្តដឹកអ្នកដំណើរនៅកាហ្សាស្ថានស្លាប់មនុស្ស៥២នាក់​

រថយន្តក្រុងដឹកអ្នកដំណើរមួយគ្រឿងបានឆេះនៅពេលកំពុងធ្វើចរាចរណ៍លើផ្លូវនៅភាគខាងជើងនៃប្រទេសកាហ្សាស្ថានបានបណ្តាលឲ្យមនុស្សចំនួន៥២នាក់ស្លាប់ និង ៥នាក់ផ្សេងទៀតត្រូវបានជួយសង្គ្រោះ។​

តាមរបាយការណ៍របស់ក្រសួងមហាផ្ទៃនៃប្រទេសនេះ គឺបង្ហាញថា រថយន្តដឹកអ្នកដំណើរបានឆេះ កាលពីព្រឹកថ្ងៃព្រហស្បតិ៍ម្សិលមិញនៅក្នុងតំបន់មួយឈ្មោះ Aktobe​។​ នេះបើតាមសារព័ត៌មាន BBC​។​

រថយន្តក្រុងនោះដឹកអ្នកដំណើរជាជនអន្តោប្រវេសន៍Uzbek ដើម្បីស្វែងរកការងារផ្នែកកម្មករសំណង់នៅក្នុងប្រទេសរុស្ស៊ី។​

ទីភ្នាក់ងារព័ត៌មាន​AFPបានដកស្រង់សម្តីរបស់មន្ត្រីរដ្ឋាភិបាលចុះផ្សាយថា ក្នុងចំណោម​៥៥នាក់ដែលស្លាប់ដោយសារឆេះរថយន្តក្រុងនេះក៏មាន អ្នកបើកបរពីរនាក់នៅលើនោះដែរ។​

អ្នកដែលរស់រានពីហេតុការណ៍នេះ បានថ្លែងថា រថយន្តចាប់ផ្តើមឆេះយ៉ាងឆាប់រហ័សក្រោយពេល ដែលមានសំឡេងផ្ទុះកើតឡើងភ្លាមៗ​ ប៉ុន្តែពួកគេមិនបានដឹងថា ផ្ទុះអ្វីនោះទេ៕