កូនប្រុសច្បងរបស់លោកនាយករដ្ឋមន្ត្ រីហ៊ុន សែន គឺលោក ហ៊ុន ម៉ាណែត បានជួបពិភាក្សាអំពីកិច្ចសហប្រតិបត្តិការយោធា និងការប្រឆាំងភេរវកម្មជាមួយភាគីអាមេរិក។
យោងតាមគេហទំព័រស្ថានទូតអាមេរិកប្រចាំកម្ពុជាបានឲ្យដឹងថា លោក ហ៊ុន ម៉ាណែត និងលោក William Heidt បានទទួលទានអាហារថ្ងៃត្រង់កាលពីថ្ងៃទី១៧ខែកុម្ភៈ នៅនិវាសដ្ឋានរបស់លោកឯកអគ្គរដ្ឋទូត។ ទំព័រហ្វេសប៊ុកដដែលនេះ បានឲ្យដឹងថា នៅក្នុងពេលនោះ ភាគីទាំងពីរបានពិភាក្សាដោយផ្តោតលើកិច្ចសហប្រតិបត្តិការយោធា និងការប្រឆាំងភេរវកម្ម។
លោក ហ៊ុន ម៉ាណែត បានទទួលសញ្ញាប័ត្រពីបណ្ឌិតសភាយោធារបស់សហរដ្ឋអាមេរិក ដែលមានឈ្មោះថា West Point នៅឆ្នាំ១៩៩៩។ បច្ចុប្បន្នលោកមានតួនាទីជាប្រធានអង្គភាពប្រឆាំងភេរវកម្ម នៃក្រសួងការពារជាតិ។
លោក ហ៊ុន ម៉ាណែត បច្ចុប្បន្នក៏កំពុងជាប់បណ្តឹងនៅរដ្ឋកាលីហ្វ័រនៅសហរដ្ឋអាមេរិក ករណីអង្គរក្សលោកចាប់បោកលោក ផល ហេរ បណ្តាលឲ្យរងរបួសឆ្អឹងខ្នង កាលពីថ្ងៃទី៩ខែមេសាឆ្នាំ២០១៦ ខណៈមន្ត្រីតុលាការរូបនោះយកដីកាជូនលោក ហ៊ុន ម៉ាណែត ពេលលោកទៅអាមេរិក។ លោក ផល ហេរ ថា អំពើហិង្សានេះ បានរំលោភលើច្បាប់រដ្ឋកាលីហ្វ័រញ៉ានិងរំលោភច្បាប់ជាតិសហរដ្ឋអាមេរិកផង៕