រដ្ឋអំណាចទីក្រុងវ៉ាស៊ីនតោន ជំរុញឲ្យទីក្រុងប៉េកាំង បន្តដាក់សម្ពាធលើកូរ៉េខាងជើង ឲ្យត្រឡប់ទៅរកតុចរចាវិញ ដើម្បីការពារកុំឲ្យទីក្រុងព្យុងយ៉ាង បន្តកម្មវិធីអាវុធនុយក្លេអ៊ែបង្កជម្លោះនៅក្នុងតំបន់។
រដ្ឋមន្ត្រីក្រសួងពាណិជ្ជកម្មរបស់ចិន បានថ្លែងថា ចិនបានផ្អាកការនាំចូលទំនិញពីកូរ៉េខាងជើងចាប់ពីថ្ងៃទី១៩ខែកុម្ភៈ ហើយបានបញ្ជាក់ថា នេះ គឺជាផ្នែកដែលទីក្រុងប៉េកាំងចូលរួមជាមួយសហគមន៍អន្តរជាតិក្នុងការដាក់ទណ្ឌកម្មប្រឆាំងរដ្ឋអំណាចទីក្រុងព្យុងយ៉ាង។
នៅដើមខែកុម្ភៈនេះ ទីក្រុងព្យុងយ៉ាង បានសាកល្បង អាវុធមីស៊ីលឆ្លងទ្វីប ដែលជាការបាញ់សាកល្បងលើកដំបូង ចាប់តាំងពីលោកដូណល ត្រាំ បានចូលកាន់តំណែងកាលពីថ្ងៃទី២០ខែមករា។
រដ្ឋការលោកត្រាំ ថ្លែងថា ចិនគួរតែមានសម្ពាធបន្ថែមទៀត លើរដ្ឋអំណាចទីក្រុងព្យុងយ៉ាង ចំពោះការដំណើរប្រតិបត្តិការលើកម្មវិធីអាវុធនុយក្លេអ៊ែ។
អ្នកនាំពាក្យក្រសួងការបរទេសអាមេរិកថ្លែងថា ប្រទេសទាំងអស់គួរតែធ្វើការឲ្យមានតម្លាភាព ក្នុងការអនុវត្តន៍ តាមគោលការណ៍ដំណោះស្រាយរបស់ក្រុមប្រឹក្សា សន្តិសុខអង្គការសហប្រជាតិ។ លោកថា ចិនជាដៃគូពាណិជ្ជកម្មធំបំផុតរបស់កូរ៉េខាងជើង ដូច្នេះចិនត្រូវធ្វើសកម្មភាពឲ្យលេចធ្លោក្នុងការដាក់វិធានការលើកូរ៉េខាងជើង។
រដ្ឋមន្ត្រីក្រសួងពាណិជ្ជកម្មរបស់ចិនបានបញ្ជាក់ថា ការបញ្ឈប់នាំធ្យូងថ្មពីកូរ៉េខាងជើង អាចនឹងបន្តអនុវត្តរហូតដល់ខែធ្នូឆ្នាំ២០១៧។