ក្រុមពលរដ្ឋជាង ១០០នាក់ ដែលអះអាងថា បានចាញ់បោកក្រុមហ៊ុន Empire Big Capital Limited ហៅកាត់ថា EBC នោះ បានប្រមូលផ្តុំគ្នានៅមុខខុទ្ទកាល័យនាយករដ្ឋមន្រ្តីជាថ្មីទៀតនៅថ្ងៃនេះ ដោយបានស្នើទៅលោក ហ៊ុន សេន ឲ្យជួយរកយុត្តិធម៌ជូនពួកគេ ខណៈដែលពួកគេអះអាងថា ម្នាក់ៗបានខាតបង់ប្រាក់យ៉ាងតិច ១ម៉ឺនដុល្លារ។
ក្រុមពលរដ្ឋទាំងនោះ បានចោទប្រកាន់ក្រុមហ៊ុន EBC ថា បានបោកប្រាក់ជាង ៦០លានដុល្លារពីពលរដ្ឋប្រហែល ៥ម៉ឺននាក់ តាមរយៈការប្រមូលប្រាក់ពីពលរដ្ឋ ដោយសន្យាផ្ដល់ការប្រាក់ ១០ភាគរយនៃប្រាក់វិនិយោគក្នុងមួយខែៗ។
ជាអ្នកភូមិមកពីខេត្តព្រៃវែង លោក សម វុទ្ធី បានប្រាប់វីអូឌីថា គ្រួសារគាត់ចាញ់បោកប្រាក់ក្រុមហ៊ុន EBC អស់ ១ម៉ឺន ២ពាន់ដុល្លារ។ លោកបន្ថែមថា កន្លងមករូបលោក និងពលរដ្ឋដទៃទៀត បានរកកិច្ចអន្តរាគមន៍ពីក្រសួងមហាផ្ទៃ ក្រសួងយុត្តិធម៌ រដ្ឋសភា និងខុទ្ទកាល័យនាយករដ្ឋមន្រ្តីនេះផងដែរ ប៉ុន្តែ មិនទទួលបានដំណោះស្រាយឡើយ។
លោកបន្ថែមថា៖«ពួកយើងសុំឲ្យសម្តេចជួយ ពីព្រោះក្រុមហ៊ុនហ្នឹងមករកស៊ីក្នុងស្រុកខ្មែរ ហើយមានចំណារយល់ព្រមបោះត្រាសញ្ញេពីក្រសួងមហាផ្ទៃ ពីក្រសួងសេដ្ឋកិច្ចហិរញ្ញវត្ថុ មូលប័ត្រកម្ពុជា និងបានធ្វើបទបង្ហាញទៅតាមបណ្តាសណ្ឋាគារ និងទីរួមខេត្តមួយចំនួន គឺធ្វើនៅសាលាខេត្តតែម្តង។ សួរថា ធ្វើឲ្យប្រជាជនភ័យអីទៀត? អញ្ចឹងបងប្អូន មិនត្រឹមតែរាស្រ្តសាមញ្ញទេ មន្រ្តីធំនៅភ្នំពេញ ក៏មានចាញ់បោកក្រុមហ៊ុននេះដែរ តែគេមិនចេញមុខ»។
ដោយអះអាងថាមកពីខេត្តឧត្តមានជ័យ លោក ស រ៉េត និយាយថា ដោយសារតែមានការផ្សព្វផ្សាយតាមរយៈការទទួលពីអាជ្ញាធរ និងមានការផ្តល់ការប្រាក់ខ្ពស់ គ្រួសារគាត់បានលក់របស់របរមួយចំនួន និងខ្ចីលុយបន្ថែមពីធនាគារផ្សេងសរុបប្រមាណ ១ម៉ឺន ៨ពាន់ដុល្លារ យកមកចង់ការបន្តនៅក្រុមហ៊ុន EBC នេះទាំងអស់។
លោកបន្ថែមថា៖ «ក្រុមហ៊ុនពេលទៅឃោសនាគេថា មានច្បាប់អនុញ្ញាត្តិពីក្រសួងមហាផ្ទៃ ខាងហិរញ្ញវត្ថុគេថា មានច្បាប់អស់ហើយ គេចាក់ស្លាយឲ្យយើងមើលពេលសិក្ខាសាលាទៀត អញ្ចឹងពួកខ្ញុំប្រជាពលរដ្ឋអ្នកល្ងង់ ពេលឃើញគេបង្ហាញតាមស្លាយអញ្ចឹង ចេះតែជឿគេស្លុប។ អញ្ចឹងពួកខ្ញុំល្ងឹតល្ងង់ ចេះតែតាមគេតាមឯងទៅ»។
លោក គង់ ចំរើន ជាមន្រ្តីខុទ្ទកាល័យនាយករដ្ឋមន្រ្តី បានប្រាប់ទៅប្រជាពលរដ្ឋឲ្យរង់ចាំសិន ដោយថា រដ្ឋាភិបាលមានយន្តការ និងកំពុងធ្វើការលើរឿងនេះហើយ។
កាលពីឆ្នាំ២០១៧ ក្រសួងមហាផ្ទៃ ក្រសួងយុត្តិធម៌ រួមទាំងស្ថាប័នពាក់ព័ន្ធផ្សេងទៀត បានធ្វើសន្និសិទសារព័ត៌មានមួយ ដោយបង្ហាញមុខមេខ្លោងមួយចំនួនមាន ឈ្មោះ លោក ស៊ាន តាន់ ជាក្រុមហ៊ុនអ៊ីប៉ីស៊ី (EBC) ឈ្មោះ ហួត សុវណ្ណ ជាប្រធានអង្គការមូលនិធិអភិវឌ្ឍន៍អាស៊ីអាគ្នេយ៍ ឈ្មោះ ជីហ្គោ សាលី ជាប្រធានសមាគមប្រឹក្សាយោបល់វិនិយោគ និងបក្សពួកផ្សេងទៀត។
ក្រោយសន្និសិទនោះ សមត្ថកិច្ចបានចាប់ខ្លួនមនុស្ស ២នាក់ បញ្ជូនទៅតុលាការ ដោយសង្ស័យថា ជាប់ពាក់ព័ន្ធជាមួយក្រុមហ៊ុន អ៊ីប៉ីស៊ី (EBC) ក្នុងករណីរឿងឆបោកប្រាក់ពលរដ្ឋនេះ។
កាលណោះ ក្រសួងមហាផ្ទៃ ឲ្យដឹងថា ក្រសួងទទួលបានពាក្យបណ្តឹងពីពលរដ្ឋប្រមាណ ៧ ៤៣០បណ្តឹង ក្នុងចំណោមជនរងគ្រោះ ៥ម៉ឺននាក់ និងទឹកប្រាក់ជាង ៦០លានដុល្លារ ប៉ុន្តែ កាលណោះ មន្រ្តីក្រសួងមហាផ្ទៃថា ទិន្នន័យពិតប្រាកដអាចមានច្រើនជាងនេះ៕