សមាជិកសហគមន៍មួយនៅខេត្ដសៀមរាបឲ្យដឹងថា មន្ដ្រីមន្ទីរកសិកម្មខេត្ដនេះបានប្រើអាវុធបាញ់គំរាមជាច្រើនគ្រាប់នៅតំបន់អភិរក្សទេសចរណ៍ធម្មជាតិបឹងពារាំង បន្ទាប់ពីពលរដ្ឋហាមឃាត់មិនឲ្យមន្រ្តីរូបនោះចាប់ត្រីនៅតំបន់អភិរក្សសត្វស្លាបនិងមច្ឆាជាតិ។
សមាជិកសហគមន៍វប្បធម៌ធម្មជាតិបឹងពារាំង ដែលសុំមិនឲ្យបញ្ចេញឈ្មោះ ប្រាប់វីអូឌី នៅល្ងាចថ្ងៃទី១៨ខែមេសានេះថា កាលពីម៉ោង៦ល្ងាចថ្ងៃទី១៧ខែមេសានេះ មនុស្សមួយក្រុមជិត២០នាក់ ដែលមានទាំងប្រធានមន្ទីរកសិកម្មខេត្ដសៀមរាប លោក ទា គឹមសុទ្ធ ផងនោះ បានប្រើអាវុធខ្លីមិនស្គាល់ម៉ាក បាញ់ឡើងលើ៧គ្រាប់ គំរាមប្រជាសហគមន៍ បន្ទាប់ពីពួកគេហាមឃាត់មិនឲ្យរកត្រីក្នុងតំបន់អភិរក្សធម្មជាតិបឹងពារាំង នៅសង្កាត់ជ្រាវ ក្រុងសៀមរាប។ សមាជិករូបនោះ បន្ដថា អ្នកដែលបាញ់បោះសេរីទាំងនោះជាមន្ដ្រីមន្ទីរកសិសកម្ម ខណៈពួកគេផឹកស្រវឹងពេលទៅកំសាន្ដនៅតំបន់នោះ។
ករណីនេះ ប្រធានមន្ទីរកសិកម្មខេត្ដសៀមរាប លោក ទា គឹមសុទ្ធ ដែលទើបកាន់តំណែងថ្មីបានបដិសេធពីការចោទប្រកាន់នេះ ដោយថា ការបាញ់បោះសេរីនោះ មិនមែនជាក្រុមរបស់លោកទេ។ លោកបន្ដទៀតថា លោកទៅតំបន់នោះទៅធ្វើការងារជាមួយសហគមន៍ និងមានមន្ដ្រីមន្ទីរសុរិយោដីខេត្ដ មន្ដ្រីអាជ្ញាធរជាតិអប្សរា និងសមាជិកសហគមន៍ជាច្រើនទៀត ដោយថា ក្រុមពួកលោក គ្មានអាវុធប្រើប្រាស់នោះឡើយ។
ទោះជាយ៉ាងនេះក្ដី ប្រធានសហគមន៍វប្បធម៌ទេសចរណ៍ធម្មជាតិ បឹងពារាំង លោក គង់ មង្គល ឲ្យដឹងថា ក្រុមបាញ់បោះសេរីនោះ គឺពួកគេបានទៅកំសាន្ដជាលក្ខណៈអ្នកទេសចរណ៍ ដែលមានលោក ទា គឹមសុទ្ធ ប្រធានមន្ទីរកសិកម្មខេត្ដសៀមរាបផងដែរ។ លោកថាអ្នកទាំងនោះមានអាការៈស្រវឹងស្រាផង និងខឹងសមាជិកសគមន៍ហាមឃាត់មិនឲ្យរកត្រីក្នុងតំបន់ទេសចរណ៍ផងទើបមានការបាញ់បោះ។ លោកបន្ដថា សមាជិកសហគមន៍រើសបានសំបកគ្រាប់ចំនួន៤សំបកនៅក្នុងទូក ប៉ុន្ដែមិនស្គាល់ម៉ាក។លោកចាត់ទុកជាទង្វើនេះជាគំរូអាក្រក់ដល់សហគមន៍ និងបង្កឲ្យមានការភ័យខ្លាចដល់ភ្ញៀវទេសចរណ៍ទៅវិញ មិនតែប៉ុណ្ណោះធ្វើឲ្យសត្វស្លាបផ្អើលចេញពីតំបន់អភិរក្សផងដែរ។
បើតាមសហគមន៍ឲ្យដឹងថា តំបន់ទេសធម្មជាតិបឹងពារាំង មានទំហំ៣៤០០ហិកតា ស្ថិតនៅខាងជើងបឹងទន្លេសាប ក្នុងសង្កាត់ជ្រាវក្រុងសៀមរាប។ បឹងនោះជាកន្លែងអភិរក្សសត្វស្លាប និងមច្ឆាជាតិ ដែលមានការទាក់ទាញឲ្យភ្ញៀវទេសចរណ៍ជាតិ និងអន្ដរជាតិទៅកំសាន្តជាបន្ដបន្ទាប់៕