ក្រុមហ៊ុនអាកាសចរណ៍ Egypt Air បាននិយាយថាយន្តហោះដឹកអ្នកដំណើរ៦៩នាក់មួយគ្រឿងដែលហោះហើរពីទីក្រុងប៉ារីសទៅទីក្រុងគែរបានបាត់ការទាក់ទងនៅថ្ងៃព្រហស្បតិ៍ ដោយបានបាត់ខ្លួនពីរ៉ាដានៅតំបន់សមុទ្រមេឌីទែរ៉ាណេ។
ទីភ្នាក់ងារព័ត៌មាន Reuters បានរាយការណ៍ថា ក្រុមហ៊ុននោះបានសរសេរនៅលើគណនី Twitter ផ្លូវការរបស់ខ្លួនថា យន្តហោះ MS804 ដែលហោះហើរពីទីក្រុងប៉ារីសទៅទីក្រុងគែរបានបាត់ខ្លួនពីរ៉ាដា។
បន្ទាប់មកក្រុមហ៊ុននេះបាននិយាយថា យន្តហោះនោះបានបាត់ខ្លួនក្រោយពីចូលដល់ដែនអាកាសអេហ្ស៊ីប។ យន្តហោះនោះដឹកអ្នកដំណើរ៥៩នាក់និងបុគ្គលិកបម្រើការលើយន្តហោះ១០នាក់។
យោងតាមគេហទំព័រ Flightradar24.com បានឲ្យដឹងថា យន្តហោះដែលបាត់ខ្លួននោះគឺជាយន្តហោះ Airbus A320 ហើយទីតាំងចុងក្រោយដែលគេបានដឹងគឺនៅលើសមុទ្រមេឌីទែរ៉ាណេ។
យន្តហោះ Airbus A321 មួយគ្រឿងដែលប្រតិបត្តិការដោយក្រុមហ៊ុន Metrojet របស់រុស្ស៊ីបានធ្លាក់នៅតំបន់ស៊ីណៃកាលពីថ្ងៃទី៣១ ខែតុលា ឆ្នាំ២០១៥ ដោយបានសម្លាប់មនុស្សទាំង២២៤នាក់នៅលើយន្តហោះនោះ។ រុស្ស៊ីនិងរដ្ឋាភិបាលបស្ចឹមប្រទេសបាននិយាយថា យន្តហោះនោះអាចរងការបំផ្ទុះគ្រាប់បែក ហើយក្រុមឧទ្ទាមរដ្ឋអ៊ីស្លាមបាននិយាយថាខ្លួនបានដាក់គ្រឿងផ្ទុះនៅលើយន្តហោះនោះ៕
