តុលាការថៃបើកសវនាការកាត់ទោសអ្នកពាក់ព័ន្ធការជួញដូរមនុស្សជាទ្រង់ទ្រាយធំក្នុងស្រុក និង ឆ្លងដែននៅព្រឹកថ្ងៃពុធនេះ ដែលមាន២១ករណី ក្នុងនោះជនជាប់ចោទដែលបញ្ជូនទៅសវនាការនៅតុលាការក្រុងបាងកកមាន១០៣នាក់។
អ្នកពាក់ព័ន្ធការជួញដូរទាំងនោះខ្លះមានការរៀបចំជួញដូរក្នុងស្រុក និង ឆ្លងដែន ពាក់ព័ន្ធការប្រើអំណាចសម្លាប់ និង រំលោភផ្លូវភេទជាដើម។ នេះបើតាមសារព័ត៌មាន Channel News Asia។
ជនជាប់ដែលតុលាការកំពុងកាត់ទោសនេះ មានពាក់ព័ន្ធទាំង ថ្នាក់ឧត្តមសេនីយ៍ក្នុងជួរទាហានថៃ មន្ត្រីនគរបាល អ្នកនយោបាយនៅតាមមូលដ្ឋាន និងជនជាតិមីយ៉ាន់ម៉ាផង ដែលពួកគេរងការចោទថា រត់ពន្ធ និង ជួញដូរមនុស្សឆ្លងកាត់ព្រំដែន ថៃ-ម៉ាឡេស៊ី។
ទាក់ទងការកាត់ក្តីនេះ មេដឹកនាំយោធាថៃ លោកប្រាយុទ្ធចាន់ អូចា អំពាវនាវឲ្យពលរដ្ឋកុំមានការខឹងសម្បារជារួមយោធាទាំងអស់ ដោយបញ្ជាក់ថា មានតែទាហានខ្លះតែប៉ុណ្ណោះដែលពាក់ព័ន្ធការជួញដូរនេះ។លោក ថ្លែងនៅថ្ងៃពុធនេះថា ទាហានទាំងនេះគឺជាក្រុមបណ្តាញអ្នកជួញដូរមនុស្ស មិនមែនទាំងអស់នោះទេ។
ករណីជំនុំជម្រះនៅថ្ងៃនេះគឺពាក់ព័ន្ធការជួញដូរមនុស្សតាំងពីឆ្នាំ២០១៥មក ក្រោយពេលរដ្ឋាភិបាលបានដឹង និងបង្ក្រាបក្រុមជួញដូរមនុស្សឆ្លងកាត់ព្រំដែនថៃម៉ាឡេស៊ី ដែលករណីខ្លះចាប់ជំរិតពេលទារលុយបានរួចដោះលែង និង ខ្លះទៀតត្រូវបានសម្លាប់ពេលចាប់ជំរិតនោះ៕