តាមការសិក្សារបស់អង្គការអន្តរជាតិផ្នែកមនុស្សធម៌ និង ជួយដល់ជនរងគ្រោះបានបង្ហាញថា មនុស្សប្រមាណ១៦លាននាក់នៅតំបន់អាស៊ីខាងត្បូងត្រូវជួបគ្រោះទឹកជំនន់ នៅក្នុងរដូវភ្លៀងធ្លាក់ច្រើន ដែលត្រូវការមានដំណោះស្រាយលើបញ្ហារបស់ពួកគេ។
តាមការសិក្សាបង្ហាញថា ទឹកជំនន់នៅក្នុងប្រទេស នេប៉ាល់ បង់ក្លាដេស និង ប្រទេសឥណ្ឌា អាចឈានដល់ការសម្លាប់មនុស្សប្រមាណ៥០០នាក់ ឬ អាចច្រើនជាងនេះ។
សហព័ន្ធកាកបាទក្រហមនិងអឌ្ឍចន្ទក្រហមអន្តរជាតិ (IFRC) បង្ហាញការសិក្សាថា នៅក្នុងតំបន់ទាំងនេះកំពុងជួបវិបត្តិហើយត្រូវការសកម្មភាពមនុស្សធម៌។ បញ្ហាដែលកំពុងប្រឈមពេលនេះ គ្រោះលិចលង់ដោយទឹកជំនន់ និង ការរាតត្បាតនៃជំងឺឆ្លង។នេះបើតាមសារព័ត៌មានBBC។
អនុប្រធានប្រចាំតំបន់នៃអង្គការអឌ្ឍចន្ទក្រហមអន្តរជាតិ លោក Martin Faller ថ្លែងថា ច្រើនជាង១ភាគ៣នៃពលរដ្ឋបង់ក្លាដេស និង នេប៉ាល់ ជួបបញ្ហាទឹកជំនន់ ខណៈពលរដ្ឋនៅភាគខាងជើងឥណ្ឌាប្រមាណ១១លាននាក់ ក៏រងផលប៉ះពាល់ដែរ។ ក្នុងចំណោមនេះពលរដ្ឋប្រមាណ១០លាននាក់ត្រូវជម្លៀសរកកន្លែងមានសុវត្ថិភាព។
លោក Martin Faller បន្តថា នេះ ជាបញ្ហាប្រឈមខ្លាំងក្នុងការដោះស្រាយរបស់ក្រុមការងារមនុស្សធម៌ ដែលត្រូវមានការប្រជុំជាមួយអ្នកពាក់ព័ន្ធស្វែងរកដំណោះស្រាយបន្ទាន់។
បច្ចុប្បន្នទឹកជំនន់កំពុងគំរាមកំហែងដល់ជីវិតមនុស្សសត្វហើយនោះ ក៏មានភ្លៀងខ្លាំងនៅបន្តធ្លាក់ដែលបណ្តាលឲ្យឥទ្ធិពលនៃទឹកជំនន់កាន់តែអាក្រក់ឡើងថែមទៀត។ ប្រែសម្រួល ដោយពៅ មេត្តា