រដ្ឋមន្ត្រីការបរទេសអាមេរិកជំរុញឲ្យកូរ៉េខាងជើងផ្អាកកម្មវិធីអាវុធក្លេអ៊ែ ហើយងាកមកតុចរចាជំហានដំបូងឆ្ពោះទៅរកការចរចាជាមួយសហរដ្ឋអាមេរិកនិងភាគីសំខាន់ៗទៀតក្នុងពិភពលោក។
ថ្លែងក្នុងកិច្ចប្រជុំជាមួយរដ្ឋមន្ត្រីការបរទេសជប៉ុននិងកូរ៉េខាងត្បូង លោក ចន ឃែរី ថាអាមេរិកនៅតែប្តេជ្ញាចិត្តក្នុងការការពារសុវត្ថិភាពឲ្យគ្នាទៅវិញទៅមក ក្នុងការទប់ស្កាត់ការគំរាមកំហែងពីកូរ៉េខាងជើង។ លោកបន្តថា អាមេរិកត្រៀមខ្លួនជាស្រេចក្នុងការចរចាសន្តិភាពលើបញ្ហាឧបទ្វីបកូរ៉េ បញ្ចប់ការបែងចែកកូរ៉េទាំងសង្គមនិងសេដ្ឋកិច្ច។ នេះបើតាមទីភ្នាក់ងារសារព័ត៌មាន AFP។
លោក ឃែរី ថ្លែងថាជាជំហានបឋមគឺត្រូវឲ្យកូរ៉េខាងជើងផ្អាក គឺត្រូវផ្អាកសកម្មភាពបង្កជម្លោះផ្សេងៗ ផ្អាកសាកល្បងអាវុធនុយគ្លេងអ៊ែ និងការជម្លោះតាមបណ្តោយព្រំដែនផ្សេងៗទៀត។
នៅក្នុងខែនេះ កូរ៉េខាងជើងបានបាញ់សាកល្បងអាវុធនុយក្លេអ៊ែលើកទី៥របស់ខ្លួន ដែលបានបង្ហាញអាវុធមីស៊ីលជាបន្តបន្ទាប់ ហើយអង្គការសហប្រជាជាតិនិងប្រទេសផ្សេងៗទៀតបានប្រកាសថ្កោលទោស៕
