គ្រួសារកងទ័ពរបស់កម្ពុជាចំនួន៤ដែលបាត់បង់ជីវិតកាលពីខែឧសភា ក្នុងពេលបំពេញការងារក្នុងក្របខណ្ឌកងទ័ពអង្គការសហប្រជាជាតិ ឬហៅទ័ពមួកខៀវ ទទួលបានថវិកា៧ម៉ឺនដុល្លារក្នុង១គ្រួសារ។
ការប្រគល់ថវិកាឲ្យគ្រួសារសពទាហានមួកខៀវនេះ ធ្វើឡើងដោយតំណាងអង្គការសហប្រជាជាតិ និងរដ្ឋមន្ត្រីក្រសួងការបរទេសរបស់កម្ពុជា ធ្វើឡើងនៅទីស្ដីការក្រសួងការបរទេសកាលពីម្សិលមិញ។
ទាហានមួកខៀវកម្ពុជា ត្រូវពួកឧទ្ទាមសម្លាប់ កាលពីថ្ងៃទី៨ ខែឧសភា ខណៈពួកគេកំពុងបំពេញបេសកកម្មក្នុងនាមជាកងកម្លាំងរក្សាសន្តិភាពនៅប្រទេសអាហ្វ្រិកកណ្ដាល។
ទាហានមួកខៀវទាំង៤នាក់នោះ មានឈ្មោះ អ៊ឹម សំ មានស្រុកកំណើតនៅខេត្តសៀមរាប លោក ស៊ាង នរិន្ទ មានស្រុកកំណើតខេត្តកំពត លោក មុំ តុលា មានស្រុកកំណើតនៅខេត្តពោធិ៍សាត់ និងលោក ម៉ៅ អេង រស់នៅភ្នំពេញ៕
