លោកនាយករដ្ឋមន្ត្រី ហ៊ុន សែន បានប្រកាសនៅថ្ងៃនេះថា រដ្ឋាភិបាលនឹងសាងសង់គិលានដ្ឋាន ឬពេទ្យបង្អែកធំមួយនៅតំបន់រោងចក្រ 7NG ដើម្បីផ្តល់នូវកិច្ចគាំពារសុខុមាលភាពដល់កម្មករដែលកំពុងធ្វើការនៅតំបន់នោះ។
លោក ហ៊ុន សែន បានប្រកាសបែបនេះ នៅលើទំព័រហ្វេសប៊ុកផ្លូវការរបស់លោកនៅថ្ងៃទី១៩ ខែវិច្ឆិកានេះ ខណៈដែលលោកជួបសំណេះសំណាលជាមួយក្រុមកម្មករជាង ៤ពាន់នាក់ នៅឯមជ្ឈមណ្ឌលកោះពេជ្រ។
ក្នុងទំព័រហ្វេសប៊ុករបស់លោក លោនាយករដ្ឋមន្ត្រី បានសរសេរថា៖ «រាជរដ្ឋាភិបាលនឹងសាងសង់គិលានដ្ឋាន (ពេទ្យបង្អែក)ធំមួយនៅតំបន់រោងចក្រ 7NG ដើម្បីផ្តល់នូវកិច្ចគាំពារសុខុមាលភាពដល់បងប្អូនកូនក្មួយកម្មករដែលកំពុងធ្វើការនៅក្នុងរោងចក្រនោះ។ នៅពេលដែលសាងសង់រួចហើយ គឺកូនក្មួយកាន់តែងាយស្រួលក្នុងការពិនិត្យសុខភាព និងទទួលបាននូវការព្យាបាលភ្លាមៗទាន់ពេលវេលានៅហ្នឹងកន្លែងតែម្តង»។
ជាមួយគ្នានោះ លោកក៏បានជំរុញទៅកម្មករជឿទុកចិត្តលើការខិតខំដោះស្រាយរបស់លោក ដោយថា ជាការគិតគូរអំពីសុខទុក្ខរបស់កម្មករកម្មការិនីផ្ទាល់ ជាពិសេសនោះកម្មការិនីមានផ្ទៃពោះ។
លោកនាយករដ្ឋមន្ត្រី ហ៊ុន សែន បានជួបសំណេះសំណាលជាមួយក្រុមកម្មករកម្មការិនីនៅរៀងរាល់ថ្ងៃអាទិត្យ និងចុះជួបកម្មករកម្មការិនីនៅតាមរោងចក្រដោយផ្ទាល់ នៅរៀងរាល់ថ្ងៃពុធ ចាប់តាំងពីថ្ងៃទី២០ ខែសីហា៕
