អង្គការសហប្រជាជាតិស្ដីពីការឃុំឃាំងដោយឥតច្បាប់(WGAD) បានចាត់ទុកការឃុំខ្លួនមន្រ្តីសិទ្ធិមនុស្ស និងមន្រ្តីគ.ជ.ប ថាមានភាពមិនត្រឹមត្រូវ ដូចដែលក្រុមអង្គការសិទ្ធិមនុស្សក្នុងស្រុកបានលើកឡើងដែរ។
សេចក្តីប្រកាសព័ត៌មានរួម កាលពីយប់មិញ ក្រុមអង្គការសិទ្ធិមនុស្ស ឲ្យដឹងថា កាលពីថ្ងៃទី២១ ខែវិច្ឆិកា ឆ្នាំ២០១៦ អង្គការសហប្រជាជាតិស្ដីពីការឃុំឃាំងដោយឥតច្បាប់ WGAD បានយល់ស្របថា ការបន្តឃុំខ្លួនលោក នី ចរិយា អគ្គលេខាធិការរងនៃគណៈកម្មារធិការជាតិរៀបចំការបោះឆ្នោត (គ.ជ.ប) និងលោក នី សុខា លោក យី សុខសាន្ត លោក ណៃ វ៉ង់ដា និងលោកស្រី លឹម មុនី ជាមន្រ្តីបួនរូបរបស់សមាគមការពារសិទ្ធិមនុស្សនិងអភិវឌ្ឍន៍នៅកម្ពុជា (អាដហុក) គឺ “មិនត្រឹមត្រូវ”។
VOD នៅមិនទាន់អាចសុំការឆ្លើយតបពីអ្នកនាំពាក្យក្រសួងយុត្តិធម៌បាននៅឡើយទេនៅព្រឹកនេះ។
ទោះយ៉ាងណាទាំងអង្គការជាតិនិងអន្តរជាតិ បានសំណូមពរដោយទទូច ឲ្យអាជ្ញាធរកម្ពុជាអនុវត្តតាមអនុសាសន៍របស់ WGAD ដោយធ្វើការដោះលែងអ្នកការពារសិទ្ធិមនុស្សជាបន្ទាន់ និងត្រូវផ្ដល់សំណងសមរម្យដល់អ្នកទាំងនោះ។
បច្ចុប្បន្ននេះ អ្នកការពារសិទ្ធិមនុស្សទាំង៥នាក់ កំពុងត្រូវបានឃុំខ្លួនបណ្ដោះអាសន្នក្នុងពន្ធនាគាររង់ចាំសវនាការក្រោមការចោទប្រកាន់ពីបទសូកប៉ាន់សាក្សី ដែលមកទល់ពេលនេះមានរយៈពេលជិត៨ខែហើយ ។
បន្ថែមលើនេះ កាលពីថ្ងៃទី២២ ខែកញ្ញា ឆ្នាំ២០១៦ សាលាដំបូងរាជធានីភ្នំពេញបានសម្រេចផ្ដន្ទាទោសលោក នី ចរិយា ពីបទបរិហារកេរ្តិ៍ជាសាធារណៈ បទប្តឹងបរិហារបង្កាច់កេរ្តិ៍ និងបទផ្សព្វផ្សាយនូវការអត្ថាធិប្បាយដើម្បីធ្វើសម្ពាធលើយុត្តាធិការ ហើយលោកត្រូវបានកាត់ទោសឲ្យជាប់ពន្ធនាគាររយៈពេល៦ខែ។ បទចោទទាំងនេះ គឺកើតចេញមកពីសំណុំរឿងព្រហ្មទណ្ឌមួយ តាំងពីពេលលោកមានមុខងារជា ប្រធានផ្នែកសិទ្ធិមនុស្ស និងឃ្លាំមើល នៃសមាគមអាដហុក៕
