សហជីពជាង ១០០ បានប្តឹងអតីតប្រធានសហជីពសេរីកម្មករកម្ពុជា លោក ជា មុន្នី ដោយចោទថា ញុះញង់ឱ្យសហគមន៍អឺរ៉ុប និងអាមេរិក ដាក់ទណ្ឌកម្មសេដ្ឋកិច្ចមកលើប្រទេសកម្ពុជា។
ក្នុងបណ្តឹងចុះថ្ងៃទី១៨ ខែធ្នូ ក្រុមមេធាវីតំណាងសហជីព ១២០ស្ថាប័ន បានលើកឡើងថា លោក ជា មុន្នី បានអំពាវនាវទៅសហគមន៍អឺរ៉ុប ឲ្យដាក់ទណ្ឌកម្មមកលើរដ្ឋាភិបាលកម្ពុជា។
ក្នុងពាក្យបណ្តឹងដដែលនោះ ក្រុមសហជីពបានចាត់ទុកការអំពាវនាវរបស់ លោក ជា មុន្នី ថា មានចេតនាញុះញង់ឲ្យអ្នកបញ្ជាទិញទាំងអស់ឈប់ទិញផលិតផលវាយនភ័ណ្ឌ រួមទាំងផលិតផលផ្សេងៗពីកម្ពុជាទៅសហគមន៍អ៊ឺរ៉ុប និងញុះញង់ឲ្យកម្មករស្អប់ខ្ពើមរដ្ឋាភិបាល។
អាមេរិក កាលពីថ្ងៃទី០៦ ខែធ្នូកន្លងមកនេះ បានសម្រេចរឹតបន្តឹងទិដ្ឋាការសម្រាប់មន្ត្រីជាន់ខ្ពស់កម្ពុជា និងក្រុមគ្រួសាររបស់ពួកគេ ដោយថា មានជាប់ពាក់ព័ន្ធនឹងការបំផ្លាញលទ្ធិប្រជាធិបតេយ្យនៅកម្ពុជា។
បន្ទាប់ពីអាមេរិកចាត់វិធានការបែបនេះ សភាសហភាពអឺរ៉ុប បានសម្រេចកាលពីថ្ងៃទី១៤ ខែធ្នូកន្លងមក ឲ្យគណៈកម្មការអឺរ៉ុបផ្អាកការផ្ដល់ភាពអនុគ្រោះពន្ធគយមកដល់កម្ពុជា។
សហរដ្ឋអាមេរិក និងសហភាពអឺរ៉ុប បានចាត់វិធានការប្រឆាំងនឹងប្រទេសកម្ពុជា បន្ទាប់ពីគណបក្សសង្គ្រោះជាតិ ត្រូវបានតុលាការកម្ពុជា សម្រេចរំលាយចោលកាលពីថ្ងៃទី១៦ ខែវិច្ឆិកា ហើយមេដឹកនាំបក្សប្រឆាំងមួយនេះ គឺលោក កឹម សុខា មិនទាន់ត្រូវបានដោះលែងនៅឡើយរហូតមកដល់ថ្ងៃនេះ ចាប់តាំងពីលោកត្រូវបានសមត្ថកិច្ចចាប់ខ្លួនក្រោមការចោទថា «ក្បត់ជាតិ» កាលពីថ្ងៃទី០៣ ខែកញ្ញា៕