នគរបាលវៀតណាម បានបញ្ឈប់សកម្មភាពតវ៉ានិងចាប់ខ្លួនមនុស្ស២០នាក់ ដែលចូលរួមកាលពីម្សិលមិញ ក្នុងការរំឭកពីការប៉ះទង្គិចគ្នារវាងចិននិងវៀតណាម លើជម្លោះដែនកោះនៅសមុទ្រចិនខាងត្បូង កាលពីជា៤ទសវត្សរ៍មុន។
វៀតណាម និង ចិន មានជម្លោះដែនសមុទ្រអូសបន្លាយរយៈពេលវែង នៅសមុទ្រចិនខាងត្បូង ដែលចិនអះអាងថា ជារបស់ខ្លួន ចំណែកវៀតណាម និង ប្រទេសមួយចំនួនទៀតក៏អះអាងថា ជារបស់ពួកគេ ដែលតាមការប៉ាន់ស្មានគឺថ្លៃដែលទទួលបានពីការដឹកនាំទំនិញឆ្លងកាត់ផ្លូវទឹកកន្លែងមានជម្លោះនោះមាន ប្រមាណ៥ ទ្រីលានក្នុង១ឆ្នាំៗ។
ក្រុមអ្នកតវ៉ាបានធ្វើឡើងនៅទីក្រុងហាណូយ កាលពីម្សិលមិញធ្វើឡើងដោយសន្តិវិធី ដើម្បីរំឭកដល់កងទ័ពវៀតណាមដែលបានពលី ត្រូវចិនសម្លាប់ពេលប៉ះទង្គិចគ្នានៅឆ្នាំ១៩៧៤ ជាពេលដែលចិនចូលកាន់កាប់កោះប៉ារ៉ាសែលរហូតដល់បច្ចុប្បន្ន។នេះបើតាមទីភ្នាក់ងារព័ត៌មានរ៉យទ័រ។ នេះបើតាមទីភ្នាក់សារព័ត៌មានរ៉យទ័រ។
នគរបាលបានចាប់ខ្លួនអ្នកតវ៉ាចំនួន២០នាក់ រុញឡើងរថយន្ត បន្ទាប់ពីអ្នកតវ៉ាទាំងនោះ មិនស្តាប់ការព្រមានពីអាជ្ញាធរ ហើយនៅតែធ្វើសកម្មភាពតវ៉ា ដោយលើកបដា សរសេរថា បញ្ឈប់ចិនឈ្លានពាន។
រដ្ឋាភិបាលនិង នគរបាលវៀតណាមមិន អត្ថាធិប្បាយប្រាប់អ្នកសារព័ត៌មានពីការចាប់ខ្លួននេះទេ ចំណែកព័ត៌មានរដ្ឋនេះក៏មិនបានចុះផ្សាយដែរ។
ជម្លោះរវាងប្រទេសជិតខាងទាំងពីរចាប់ផ្តើមផ្ទុះឡើងខ្លាំងជាថ្មីនៅឆ្នាំ២០១៤ នៅពេលដែលចិនបានរៀបចំបូមប្រេងនៅតំបន់មានជម្លោះនោះ ហើយនាំឲ្យមានការតវ៉ាពេញប្រទេសវៀតណាម ដែលមានហិង្សាដល់ជនជាតិចិនច្រើនពាន់នាក់ដែលរកស៊ីនៅវៀតណាមប៉ែកខាងត្បូង។
វៀតណាម និង ចិនកាលពីសប្តាហ៍មុន បានសន្យា គ្រប់គ្រង លើបញ្ហាប្រឈមគ្នានោះដើម្បីសន្តិភាព នៅសមុទ្រចិនខាងត្បូង ដែលការសន្យានេះ ធ្វើឡើងនៅពេលដែលប្រធានបក្សកុម្មុនីស្តវៀតណាមលោក ង្វ្រៀន ភូទ្រុង ទៅបំពេញទស្សនកិច្ចនៅទីក្រុងប៉េកាំង៕