មន្ត្រីកម្ពុជានិងឡាវចាប់ផ្តើមជជែកស្វែងរកដំណោះស្រាយជុំវិញការខ្វែងគំនិតគ្នាចំពោះការសាងសង់ផ្លូវនៅតាមព្រំដែន ហើយត្រូវកម្លាំងទ័ពឡាវរារាំងតាំងពីថ្ងៃទី៧ខែកុម្ភៈមក។
វរៈការពារព្រំដែន១០១ អោយដឹងថា កម្លាំងទាហ៊ានឡាវ នៅបន្តបន្ថែមកម្លាំងមកបន្ទាត់ព្រំដែន ប្រមាណជាង៤០០នាក់ ដោយពង្រាយចាប់ពីចំណុចប៉ុស្តិ៍វរៈ២១ ត្រើយម្ខាងទន្លេសេសានអូរកុះដល់អូរតាក់ ទឹកដីភាគីឡាវ ដោយឡែកកម្លាំងមួយចំនួនទៀតមកឈរជើងលើដីកម្ពុជា ប្រដាប់ដោយអាវុធរារាំងមិនអោយទាហ៊ាន និងកងវិស្វកម្មកម្ពុជាធ្វើផ្លូវយុទ្ធសាស្រ្តក្រវ៉ាត់ព្រំដែន ចំណុចអូតាឡាវខេត្តស្ទឹងត្រែង។ នេះបើតាមគេហទំព័រអគ្គស្នងការដ្ឋាននគរបាលជាតិ។
គេហទំព័រដដែលឲ្យដឹងទៀតថា មន្ត្រីជំនាញកម្ពុជា និង ឡាវ នឹងប្រជុំពិភាក្សាគ្នាដើម្បីដោះស្រាយបញ្ហានេះ ចាប់ពីថ្ងៃទី២០ខែកុម្ភៈនេះ រហូតដល់ថ្ងៃទី២៧ខែដដែល។
សមត្ថកិច្ចកម្ពុជាអះអាងថា ឡាវ បានកាន់អាវុធចូលក្នុងទឹកដីកម្ពុជា ហើយពេលដែលកម្ពុជាណែនាំមិនឲ្យយកអាវុធចូលពួកគេមិនព្រមទេ ដោយបញ្ជាក់ថានេះ ជាបញ្ជារបស់ថ្នាក់លើ។
បច្ចុប្បន្ន ភាគីកម្ពុជានៅបន្តការសម្របសម្រួលបណ្តើរធ្វើបណ្តើរ ហើយខាងកម្លាំងកងវស្វកម្ម បានបន្តការស្ថាបនាផ្លូវយុទ្ធសាស្រ្តក្រវ៉ាត់ព្រំដែន ពីចំណុចដុងក្រឡរ ក្រុងស្ទឹងត្រែង ដល់ចំណុចអូតាឡាវ ស្រុកសៀមប៉ាង បានប្រវែងជាង១៥០គីឡូម៉ែត្រ លើផែនការអនុវត្ត ២៥៧គីឡូម៉ែត្រ៕
