រដ្ឋាភិបាលប្រកាសចាត់វិធានការទៅលើជនបរទេសទាំងឡាយណាដែលមករកស៊ី និងធ្វើការងារនៅកម្ពុជា ដោយមិនគោរពតាមច្បាប់ការងារ និងច្បាប់អន្តោប្រវេសន៍។
ក្នុងសេចក្តីប្រកាសរួមគ្នាចុះថ្ងៃទី១៩ ខែកុម្ភៈ ក្រសួងមហាផ្ទៃ និងក្រសួងការងារបានបញ្ជាទៅមន្រ្តីក្រោមឱវាទដែលពាក់ព័ន្ធឲ្យចុះត្រួតពិនិត្យកម្មករបរទេសតាមបណ្តាសហគ្រាស គ្រឹះស្ថាន និងកន្លែងផ្សេងៗទៀត ដែលសង្ស័យថា ស្ថាប័នទាំងនោះលាក់បំពួន និងប្រើប្រាស់កម្មករបរទេសខុសច្បាប់។
ក្នុងសេចក្តីប្រកាសដែល បញ្ជាក់ថា ករណីរកឃើញម្ចាស់ គ្រឹះស្ថាន និងស្ថាប័នណាមួយទទួលជនបរទេស ឬពលករបរទេសបម្រើការងារ ដោយគ្មានប័ណ្ណនិងសៀវភៅការងារ គឺត្រូវធ្វើការពិន័យជាប្រាក់ ឬផ្តន្ទាទោសតាមច្បាប់ស្តីការងារ និងបណ្តេញចេញពីប្រទេសកម្ពុជាតាមច្បាប់ស្តីពីអន្តោប្រវេសន៍។
ចំណែកពលករបទេសរស់នៅតំបន់ព្រំដែន ដែលចូលមកប្រទេសកម្ពុជា ក្នុងគោលបំណងប្រកបមុខរបណាមួយដោយចូលព្រឹក ចេញល្ងាចឬស្នាក់នៅរយៈពេលខ្លី ត្រូវបំពេញបែបបទតាមច្បាប់ ឬកិច្ចព្រមព្រៀងទ្វេរភាគីដែលតម្រូវឲ្យមានប័ណ្ណ និងសៀវភៅការងារ។
កាលពីថ្ងៃទី២៤ខែមករាឆ្នាំ២០១៨ អាជ្ញាធរខេត្តព្រះសីហនុបានចេញរបាយការណ៍មួយ ដោយអះអាងថា កំណើនជនបរទេសនៅក្នុងខេត្តនោះ បានធ្វើឲ្យជួបទាំងផលវិជ្ជមាន និងផល អវីជ្ជាមាន ដោយថា ក្នុងចំណោមជនបរទេសទាំងនោះ ភាគច្រើនជាជនជាតិចិន ដែលកំពុងធ្វើសកម្មភាពខុសច្បាប់ពិបាកក្នុងការរៀបចំសន្តិសុខសណ្តាប់ធ្នាប់។
កាលពីថ្ងៃទី១១ខែមករា មន្ត្រីអន្តោប្រវេសន៍កម្ពុជា បានឲ្យដឹងថា ជនបរទេសជិត ២ពាន់នាក់ ក្នុងចំណោម ៤៧សញ្ជាតិ ត្រូវបានបណ្ដេញចេញពីប្រទេសកម្ពុជាកាលពីឆ្នាំមុន ដោយក្នុងនោះ ភាគច្រើនជាជនជាតិវៀតណាម៕