ប្រទេសអូស្ត្រាលីនៅថ្ងៃបានប្រកាសថា ខ្លួនបានសម្រេចផ្អាកការវាយប្រហារតាមផ្លូវអាកាសទៅលើប្រទេសស៊ីរី ក្រោយពីអាមេរិកបានបាញ់ទម្លាក់យន្តហោះយោធាស៊ីរី និងមានការគំរាមកំហែងពីរុស្ស៊ីប្រឆាំងនឹងយន្តហោះចម្បាំងរបស់កងទ័ពសម្ព័ន្ធមិត្តដឹកនាំដោយអាមេរិក។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
Reuters បានបន្តថា រុស្ស៊ីបាននិយាយកាលពីថ្ងៃម្សិលមិញថា ខ្លួនចាត់ទុកយន្តហោះចម្បាំងរបស់កងទ័ពសម្ព័ន្ធមិត្តដឹកនាំដោយអាមេរិកដែលហោះហើរនៅភាគខាងលិចទន្លេអឺហ្វ្រាតក្នុងប្រទេសស៊ីរី ជាគោលដៅចម្បង ហើយបានប្រើប្រាស់ប្រព័ន្ធមីស៊ីល និងយន្តហោះចម្បាំងយោធា សម្រាប់តាមដានយន្តហោះទាំងនោះ ប៉ុន្តែ មិនបាននិយាយថា ខ្លួននឹងបាញ់ទម្លាក់ពួកគេនោះទេ។
ក្រសួងការពារជាតិអូស្ត្រាលី បានប្រកាសថា ជាវិធានការបង្ការខ្លួន ប្រតិបត្តិការវាយប្រហារតាមផ្លូវអាកាសរបស់កងទ័ពអូស្ត្រាលីនៅក្នុងប្រទេសស៊ីរី ត្រូវបានផ្អាកជាបណ្ដោះអាសន្ន។
រុស្ស៊ីបានបញ្ជាក់ច្បាស់ថា ខ្លួននឹងផ្លាស់ប្ដូរកងទ័ពរបស់ខ្លួន ជាការឆ្លើយតបទៅនឹងអាមេរិក ដែលបានបាញ់ទម្លាក់យន្តហោះយោធារបស់ស៊ីរី កាលពីចុងសប្ដាហ៍កន្លងមកនេះ។ ការវាយប្រហាររបស់អាមេរិកនោះ ត្រូវបានរដ្ឋាភិបាលស៊ីរី ចាត់ទុកជារឿងកើតឡើងជាលើកដំបូងចាប់តាំងពីប្រទេសធ្លាក់ទៅក្នុងសង្គ្រាមស៊ីវិលនៅឆ្នាំ២០១១៕
