មជ្ឈមណ្ឌលកំចាត់មីនកម្ពុជាបានរកឃើញគ្រាប់មិនទាន់ផ្ទុះជិត២០០០គ្រាប់ដែលបានបន្សល់ទុកមុនពេលនៃការធ្វើរដ្ឋប្រហារឆ្នាំ១៩៩៧ នៅក្រុងតាខ្មៅ ខេត្តកណ្តាល។
អគ្គនាយកនៃមជ្ឃមណ្ឌលកំចាត់មីនកម្ពុជាលោក ហេង រតនា បានសរសេរនៅលើទំព័រហ្វេសបុករបស់លោកថា កាលពីថ្ងៃទី១៩ មិថុនាម្សិលមិញ ក្រុមជំនាញស៊ីម៉ាក់បានចុះទៅប្រមូលគ្រាប់លាក់ទុកចំនួន១៨០០គ្រាប់ដែលសុទ្ធតែជាប្រភេទគ្រាប់បាញ់បុក និងបេ40 ដែលសង្ស័យថាបានលាក់ទុកមុនពេលធ្វើរដ្ឋប្រហារថ្ងៃទី៥ និង៦ កក្កដា ឆ្នាំ១៩៩៧ នៅភូមិព្រែកឫស្សី ក្រុងតាខ្មៅ ខេត្តកណ្តាល ដើម្បីចល័ត និងលាក់គ្រាប់ក្បែរគោលដៅប្រយុទ្ធ។
ព្រឹត្តិការណ៍ឆ្នាំ១៩៩៧ ជាការបង្ហូរឈាមរវាងអ្នកគាំទ្រនាយករដ្ឋមន្ត្រីទី២ លោក ហ៊ុន សែន និងអ្នកគាំទ្រនាយករដ្ឋមន្ត្រីទី១ សម្តេចក្រុមព្រះនរោត្តមរណឬទ្ធិ ដោយបានទម្លាក់សម្តេចក្រុមព្រះពីអំណាច ហើយគិតមកដល់ពេលនេះមានរយៈពេលជិត២០ឆ្នាំហើយ។ ព្រឹត្តិការណ៍នោះហើយ ដែលលោក ថូម៉ាស់ ហែមម៉ាប៊ើគ (Thomas Hammarberg) តំណាងពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំនៅកម្ពុជាហៅថាជា “រដ្ឋប្រហារ” ដែលបានបណ្ដាលអោយបាត់បង់ជីវិតមនុស្សនិងរបួសជាច្រើនរយនាក់៕
