មន្រ្តីសិទ្ធិមនុស្សដែលកំពុងជាប់ឃុំ ស្នើសុំចេញទៅព្យាបាលជំងឺនៅក្រៅពន្ធនាគារ បន្ទាប់ពីដួលនៅក្នុងបន្ទាប់ទឹកកាលពីពេលថ្មីៗ។
នេះជាការលើកឡើងរបស់ប្អូនប្រុស លោក នី សុខា មន្ត្រីការពារសិទ្ធិមនុស្សអាដហុក ដែលបានទៅជួបសួរសុខទុក្ខ បងប្រុសរបស់លោកដែលដួលសន្លប់ក្នុងបន្ទប់ទឹក នៅពន្ធនាគារ កាលពីថ្ងៃអាទិត្យ។
លោក នី លីហេង ប្អូនប្រុស លោក នី សុខា ឲ្យដឹងថា គិតត្រឹមថ្ងៃនេះ បងប្រុសរបស់លោកនៅមិនទាន់ធូរស្បើយនៅឡើយ ហើយស្នើតុលាការអនុញ្ញាតឲ្យ លោក នី សុខា ចេញទៅព្យាបាលនៅមន្ទីរពេទ្យខាងក្រៅពន្ធនាគារ ដោយថា គ្រួរពេទ្យប្រចាំពន្ធនាគារមិនមានសមត្ថភាពគ្រប់គ្រាន់។
លោកថា «គាត់ខ្សោយគឺវាបណ្ដាលពីជំងឺច្រើនមុខណាស់ ដូចជាក្រពះ ក៏ជាបញ្ហាដែរ ដែលត្រូវការឲ្យមានពេទ្យជំនាញដែលគេព្យាបាល មិនមែនគ្រាន់តែបញ្ជូនមួយភ្លេតហើយយកទៅវិញនោះទេ គាត់ត្រូវការតាមដាន ពីពេទ្យច្បាស់លាស់ណាស់ ព្រោះអីជំងឺក្រពះគាត់ធ្ងន់ធ្ងរ និងជំងឺផ្សេងៗទៀត ដូចជា តំរងនោម ក៏កាត់មានបញ្ហាដែលលូវ តាមគាត់ប្រាប់។ ជាសំណូមពរ របស់គាត់ដែលខ្ញុំទៅជួបគាត់នោះគឺគាត់សុំឲ្យតុលាការធ្វើម៉េចអនុញ្ញាតបាននៅឃុំទៅដើម្បីគាត់មានលទ្ធភាពក្នុងការស្វែងរកពេទ្យដែលមានជំនាញព្យាបាលជំងឺក្រពះគាត់ ព្យាបាលអាការៈគាត់ដែលជាមូលហេតុធ្វើឲ្យគាត់ហូប មិនបាន គាត់ដេកមិនលក់ ធ្វើឲ្យគាត់ចុះខ្សោយ ជាក់ស្ដែងដូចថ្ងៃ១៨ គាតខ្សោយរហូតដល់គាតសន្លប់បញ្ហាវាអាចប្រឈមនឹងគ្រោះថ្នាក់»។
លោកបន្តថា នៅថ្ងៃទី១៩ មិថុនា គ្រូពេទ្យរបស់អង្គការលីកាដូបានទៅពន្ធនាគារ ដើម្បីចូលទៅពិនិត្យអាការៈលោក នី សុខា ប៉ុន្តែមន្ត្រីពន្ធនាគារមិនអនុញ្ញាតឲ្យចូលនោះទេ។
ទោះបីជាគ្រូពេទ្យនៅពន្ធនាគារយកចិត្តទុកដាក់ព្យាបាលជំងឺស្វាមីអ្នកស្រីក៏ដោយ ប៉ុន្តែអ្នកស្រីនៅតែមិនមានជំនឿទៅលើការព្យាបាលនោះ ដោយសាររយៈពីរថ្ងៃនេះស្ថានភាពជំងឺនៅមិនបានធូ។ អ្នកស្រីបន្តថា នៅម៉ោង២ រសៀលនេះ មន្ត្រីពន្ធនាគាអនុញ្ញាតិឲ្យគ្រូពេទ្យអង្គការលីកាដូ ចូលទៅពិនិត្យអាការៈស្វាមីអ្នកស្រីហើយ ។ អ្នកស្រីបន្តថា ប្រសិនបើអាការៈស្វាមីអ្នកស្រីមិនធូស្រាលទៀតនោះ អ្នកស្រីនឹងស្នើសុំតុលាការយកស្វាមីមកព្យាបាលនៅមន្ទីរខាងក្រៅ។
អ្នកស្រីថា «ខ្ញុំត្រូវការយកចេញមកក្រៅដើម្បីងាយស្រួល មើលពីស្ថានភាពជំងឺធម្មតាយើងបានទៅមើលមួយភ្លេតៗគេមិនបានឲ្យយើងនៅមើល២៤ម៉ោងណា ដូចយើងនៅក្រៅណា។ នៅក្រៅយើងបានមើលគាត់ថាតើស្ថានភាពគាត់អីយ៉ាងម៉េចៗយើងដឹង បើនៅក្នុងនឹងយើងអត់ដឹង ដល់ចឹងខ្ញុំពិបាកណាស់ ហូបមិនបាន គេងមិនបាន ពិបាកចិត្តណាស់និយាយមិនចេញ ភ្លេចមើលកូនមើលចៅអស់ហើយ។ ខ្ញុំភ័យពីគាត់ពេក បើយើងបានថែដោយខ្លួនយើងវាអស់ចិត្ត ហើយណាមួយ យើងបានជួបពេទ្យដូចថាមានឧបករណ៍ត្រឹមត្រវ ច្បាស់លាស់ក្នុងនឹងគេមានមិនមានក៏ខ្ញុំមិនហ៊ានថា ប៉ុនខ្លាចថាខ្ញុំមើលទៅពីថ្ងៃដូចអត់មានធូអីបន្តិចផង»។
មេធាវីការពារក្តីរបស់លោក នី សុខា គឺលោក ឡោ ជុនធី មានប្រសាសន៍ថា ប្រសិនបើមន្ត្រីពន្ធនាគារនៅមិនអនុញ្ញាតិឲ្យគ្រូពេទ្យអង្គការលីកាដូចូលព្យាបាលជំងឺកូនក្ដីរបស់លោកទៀត លោកនឹងដាក់លិខិតទៅចៅក្រមសាលាដំបូងក្រុងភ្នំពេញ ដើម្បីស្នើសុំយកកូនក្ដីរបស់លោកមកព្យាបាលជំងឺនៅមន្ទីរពេទ្យក្រៅពន្ធនាគារ។
លោកថា «ខ្ញុំមិនទាន់បានដាក់លិខិតទេ ខ្ញុំគ្រាន់តែបានជម្រាបថា ពីម្សិលមិញប្រសិនបើគ្រូពេទ្យមិនបានចូលជួបទេ ខាងខ្ញុំនឹងដាក់លិខិតទៅតុលាការ ប៉ុន្តែព័ត៌មានព្រឹកមិញខាងខ្ញុំបានជួបចៅក្រមថាគេនឹងឲ្យពេទ្យចូលទៅពិនិត្យចឹងព័ត៌មានបន្តទៀតយើងនឹងតាមដាន»។
មន្ត្រីការពារសិទ្ធិមនុស្សអង្គការអាដហុក៤រូបគឺ លោក នី សុខា លោក យី សុខសាន្ត លោក ណៃ វ៉ងដា និងលោកស្រី លឹម មុនី រួមទាំងមន្ដ្រី គ.ជ.ប ម្នាក់ទៀត លោក នី ចរិយា ត្រូវបានអង្គភាពប្រឆាំងអំពើពុករលួយចាប់ខ្លួនកាលពីចុងខែមេសាឆ្នាំ២០១៦ ខណៈស្ថានការណ៍នយោបាយកំពុងឡើងកម្តៅ។
អ្នកទាំង៥រូបនោះ ត្រូវបានឃុំបណ្តោះអាសន្នជាងមួយឆ្នាំហើយ ដោយចោទប្រកាន់ពីបទសូកប៉ាន់សាក្សី និងសមគំនិតសូកប៉ាន់សាក្សីពាក់ព័ន្ធនឹងសំណុំរឿង ខុម ចាន់តារាទី ហៅ “ស្រីមុំ” ប៉ុន្តែតុលាការថា មិនទាន់មានភស្តុតាងគ្រប់គ្រាន់ដើម្បីកាត់ទោស៕