ការស៊ើបអង្កេតទៅលើការបុកគ្នារវាងនាវាពិឃាតរបស់អាមេរិក និងនាវាដឹកជញ្ជូនបំពាក់ទង់ជាតិហ្វីលីពីន កំពុងដំណើរការទៅ ខណៈដែលឈ្មោះនាវិកអាមេរិក ៧នាក់ ដែលបានស្លាប់នោះ ត្រូវបានគេប្រកាសជាសាធារណៈ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ក្រុមស៊ើបអង្កេតកំពុងតែស្វែងយល់ថា តើនាវាពិឃាតអាមេរិក ត្រូវបាននាវាមួយគ្រឿងទៀតបុកយ៉ាងម៉េច នៅក្នុងដែនទឹកដ៏មមាញឹកមួយនៅជិតកំពង់ផែរបស់ជប៉ុន។ នាវាដឹកកុងតឺន័រប្រហែល ២២២ម៉ែត្រ ឈ្មោះ ACX Crystal បានបត់ក្បាលក្នុងមុំ ១៨០ដឺក្រេភ្លាមៗ មុននឹងបុកគ្នាជាមួយនាវាពិឃាតអាមេរិក។ នេះដោយយោងតាមទិន្នន័យដែលទទួលបានពីវេបសាយចរាចរណ៍ផ្លូវទឹក។
អ្នកនាំពាក្យក្រុមប្រឹក្សាសុវត្ថិភាពដដឹកជញ្ជូនជប៉ុន បានឲ្យដឹងថា កងទ័ពជើងទឹកអាមេរិក និងឆ្មាំសមុទ្រជប៉ុន កំពុងធ្វើការស៊ើបអង្កេតដាច់ដោយឡែកពីគ្នា ប៉ុន្តែ មានលក្ខណៈសហការគ្នា។
ក្រុមស៊ើបអង្កេតជប៉ុន នឹងសាកសួរក្រុមនាវិកហ្វីលីពីនដែលបម្រើការនៅលើនាវាដឹកកុងតឺន័រ ដែលមានម្ចាស់ជាជនជាតិជប៉ុន ប៉ុន្តែ ក្រុមស៊ើបអង្កេតអាមេរិកមានអំណាចក្នុងការស៊ើបអង្កេតលើគ្រោះថ្នាក់ពាក់ព័ន្ធនឹងកងទ័ព៕