អតីតឧត្តមសេនីយ៍មួយរូបនៅក្នុងជូរយោធារបស់ថៃ ត្រូវបានតុលាការក្រុងបាងកកសម្រេចផ្តន្ទាទោសឲ្យជាប់ពន្ធនាគាររយៈពេល២៧ឆ្នាំ ពាក់ព័ន្ធការជួញដូរមនុស្សពីប្រទេសបង់ក្លាដេសនិងមីយ៉ាន់ម៉ា ខណៈអ្នកពាក់ព័ន្ធផ្សេងទៀតជាប់ឃុំរហូតដល់៩៤ឆ្នាំ។
អតីតឧត្តមសេនីយ៍លោក Manas Kongpan គឺជាអ្នកពាក់ព័ន្ធម្នាក់ក្នុងចំណោម៦០នាក់ផ្សេងទៀតដែលតុលាការក្រុងបាងកកប្រកាសសាលក្រមផ្តន្ទាទោសនៅថ្ងៃព្រហស្បតិ៍នេះពាក់ព័ន្ធការជួញដូរមនុស្ស ពីប្រទេសបង់ក្លាដេស និង ជនជាតិភាគតិចរ៉ូហ៊ីងយ៉ាកាន់សាសនាឥស្លាមនៅក្នុងប្រទេសមីហ៉ាន់ម៉ា។
ចំណែកមន្ត្រីផ្សេងទៀតប្រឈមមុខជាប់ពន្ធនាគារដល់៧៥ឆ្នាំ ហើយអ្នកពាក់ព័ន្ធជាង១០០នាក់ដែលកំពុងស្ថិតនៅក្នុងដំណើរការជំនុំជម្រះនោះអាចជាប់ព័ន្ធនាគារពី៤ទៅ៩៤ឆ្នាំ។ នេះបើតាមសារព័ត៌មាន BBC។
ជនជាតិភាគតិចរ៉ូហ៊ីងយ៉ាកាន់សាសនាឥស្លាម បានរត់គេចចេញពីប្រទេសមីយ៉ាន់ម៉ាចេញពីអំពើហិង្សាពីសំណាក់ក្រុមយោធា ហើយបានផ្តល់លុយឲ្យមន្ត្រីមួយចំនួននៅថៃដើម្បីឲ្យជួយពួកគេបន្តគេចខ្លួនទៅកាន់ប្រទេសដែលពួកគេចង់ទៅ។
លោក Manas Kongpan ត្រូវបានចាប់ខ្លួនកាលពីខែមិថុនាឆ្នាំ២០១៥ ដោយចោទថា មានការទទួលលុយពីក្រុមអ្នករត់ពន្ធមនុស្សឆ្លងកាត់ប្រទេសជាបន្តបន្ទាប់។ ចៅក្រមចោទប្រកាន់លោកពីបទជួញដូរមនុស្ស និង រៀបចំឲ្យមានបទឧក្រិដ្ឋឆ្លងដែន។
ចំណែកអតីតប្រធានរដ្ឋបាលនៅខេត្តភាគខាងត្បូងដែលលោក Satun Ko-Tong ដែលស្គាល់ឈ្មោះផ្លូវការរបស់លោកថា Patjuban Aungkachotephan ត្រូវតុលាការក្រុងបាងកកប្រកាសសាលក្រមផ្តន្ទាទោសក្នុងករណីដូចគ្នានេះដែរឲ្យជាប់ពន្ធនាគារ៧៥ឆ្នាំ៕